巴打些牙:近半o架仔尋花問柳

日本男人成日都咁忙,得閒梗係要放鬆一下,調查發現近半男人曾經幫襯過風俗服務。男人邊個時候最有型呢?作為男人可能以為自己喺床上交戰時最有型,但係女士就認為男人揸緊車嗰陣最型。美國咁多個州份之中,邊一個州嘅性罪犯最多呢?答案係阿拉斯加。

四成試風俗

近期日圓持續低水,去日本玩真係抵喇!男人更希望到東京嘅歌舞伎町觀摩一下當地嘅黃色事業,即係風俗服務啦。日本嘅風俗業發展蓬勃又多元化,鍾意去風俗店玩又得,租間酒店房再搵應召女郎亦得。早前有調查希望了解日本男士幫襯風俗服務嘅比率有幾高。搵嚟821名年齡介乎20至60歲嘅男士協助,結果有41.2%嘅受訪者話曾經幫襯風俗服務,至於點解會幫襯呢?原因包括應酬、體驗專業技術、獎賞自己及想碰女性肌膚等。調查負責人得知結果後又搵埋女士畀意見,日本女士就認為一次半次冇所謂,亦有指因為怕另一半會感染性病,至於話為咗應酬而幫襯風俗服務,女士們大部分都話可以接受,日本嘅女性真係明白事理。

揸車最有型

小弟身邊唔少朋友都係有車階級,問佢哋點解鍾意揸車?原因唔一定係為咗出入方便,而係有車容易溝女,答案又似乎係喎!日本有調查訪問咗三百位女士,年齡由20歲到30多歲,問題係覺得男人邊一個時候最有型。當中有10%認為男人揸車嘅時候最有型,為眾多答案嘅冠軍。排名第二嘅係男人鬆開領呔嘅時候,第三位則係握實雙拳之時。以前好多男人受廣告或電影誤導,以為吸煙嘅時候好有型,咁吸煙又排第幾呢?只得3.67%女士有此感覺,排名第六。咁各位有吸煙習慣嘅男士就敬請考慮戒煙,將慳來嘅錢買車喇。

性罪犯最多

香港嘅治安一向都相當好,至於喺先進嘅美國又點呢?從早前一個新聞網站嘅報道顯示,美國已經實行性罪犯名冊,而根據統計,美國五十個州當中,以阿拉斯加費爾班克斯嘅性犯罪比率最高,234人當中就有一名性罪犯,而紐約只係佢嘅十分之一。至於性犯罪比率最低嘅分別係明尼蘇達州、蒙大拿州、懷俄明州、猶他州及俄克拉何馬州,10,000以上居民中只有一個係性罪犯,如果有女士未來會去美國留學或工作,不妨參考一下呢個統計,再考慮去邊個州落腳喇。

撰文:賢