有人話食生蠔可以壯陽，調查就話鍾意食芝士嘅人房事亦相當多。初夜相當寶貴亦令人期待，日本就有差不多一半女仔抗拒初夜，點解呢？所謂月滿則虧，水滿則溢，任何事過量都冇益，做愛亦一樣，美國有調查顯示做愛多會令人幸福度下降。
隨住西方飲食文化普及，大家對於某些西方食物嘅抗拒亦愈來愈低，好似芝士咁，以前好多人話臭，但家陣普遍市民都了解到芝士嘅香味及營養價值。提到芝士，烤到香香脆脆嘅薄餅正因為鋪滿芝士至咁香，原來佢唔單只令人食欲大增，美國一個調查更顯示可以令人性慾上升。調查將為數四千六百個受訪者分為鍾情烤焦芝士，另一邊則鍾情未經處理嘅芝士，前者73%表示每個月至少上床一次，後者則只有63%。另外，受訪者當中亦有一班唔鍾意食芝士嘅人，發現32%熱愛食芝士嘅朋友每個月至少有六次交歡，比起唔鍾意食芝士嘅多出5%！
每個人一生當中都有好多第一次，第一次返學、識女仔、拖手仔嘅經歷相信都令人難忘。面對第一次嘅來臨大家雖然有少少緊張，但係亦唔會抗拒。然而，喺日本就有唔少女仔面對初夜時候有所抗拒。日本一個調查搵到205名年齡介乎22至35歲嘅在職女性接受訪問，佢哋全部都係處子之身，當中有42.9%表示對初夜有所抗拒，而原因各有不同，亦相當有趣，包括擔心唔識得妥善避孕、希望男方做主動之但係對方卻又太被動，亦有女仔話擔心做愛太花氣力及唔知道做一次愛要幾耐喎！我諗佢哋都係睇得AV太多，以為平常人做愛都會好似男優女優咁做得咁耐同咁激烈喇。
能夠同愛侶一齊享受床笫之歡係一件無比愉快嘅事，之不過，如果進行得頻密又係咪會令幸福感覺增加呢？事實上唔係所有事情都係一加一等於二，經研究後得出嘅答案係否定嘅。美國某大學進行一項研究，研究人員邀得64對男女協助，將佢哋分為兩組，對過去性生活不滿嘅一組需要喺三個月之內將做愛次數倍增；至於另一組對性生活滿意嘅則保持做愛次數以作對照。三個月後，結果發現做愛次數倍增嘅一組，其幸福感比正常嘅一組為低，負責人就表示做愛次數多並唔會令大家感情有所增進，着眼於做愛次數不如着重做愛質素，花多少少心思營造氣氛以及床上情趣仲好。
撰文：賢