如果以為日本嘅成人漫畫之所以咁有人氣，係因為佢哋嘅鹽花畫面夠多又夠養眼，咁就真係大錯特錯！事關佢哋喺描繪床上激情之餘，更着重故事同角色性格嘅描寫，而講到當中兼備以上三個元素嘅優秀作品，就唔可以唔提日本十八禁漫畫家青木幹治嘅單行本作品《抱緊人家嘛！》。
現居日本大阪嘅青木幹治，由於自細已習繪畫技巧，加上又做過一段長時間漫畫助理關係，故此佢嘅漫畫功底相當深厚。不過有別於其他漫畫家，獨立發展嘅佢並非向大眾漫畫界發展，而係直接跳入成人漫畫界，並成為日本人氣十八禁美少女漫畫月刊《漫畫Bangaichi》嘅主要漫畫家之一。講到佢嘅成名作，就一定唔可以唔提佢喺2009年8月10日推出嘅《再見了，乳房》。呢套作品講述貧乳女主角透過自嘲式笑話，成為網絡上熱議嘅成人漫畫，令佢從此一炮而紅。其後佢所推出嘅《節子》、《任性季節 鮮綠的盛時》同《Only You》等作品大灑鹽花嘅同時，又勁玩催淚劇情，同樣叫好又叫座，而呢本《抱緊人家嘛！》正正係佢集大成之作。
稱《抱緊人家嘛！》係佢集大成之作一啲都冇誇張，事關佢以出色嘅畫功，加上糅合搞笑、愛情、催淚等嘅元素，令呢本分為12個單元故事嘅漫畫有極大嘅觀賞性。漫畫分為兩個部分，前面8個單元主要係圍繞男主角葛和田同高傲、樣靚兼身材正女主角三崎唯，以及佢哋身邊人發生嘅愛情故事。話說葛和田有日偶遇失戀嘅三崎唯，諗住安慰對方，卻估唔到被三崎唯反客為主搞掂咗。起初兩人不過係肉體之交，卻因為其後出現嘅女角，好似主動同葛和田表白嘅美少女愛里奈、文靜可人嘅柏木等等，令三崎唯慢慢發現原來已經愛上咗男主角；後面4個單元則為四個獨立故事，當中尤以《戲劇性夫妻》最為過癮。故事講述勇救地球嘅超級英雄夫妻，回歸平靜後嘅性生活故事，絕對值得一睇！
作者：青木幹治
出版：Core Magazine
頁數：222頁
撰文：魂