究竟乜嘢叫做誘人呢？從廣義角度嚟睇，但凡可以引起異性聯想嘅都可以叫做誘人，而從呢個角度出發嘅話，其實有唔少世事都足以令人產生呢種感覺，就好似美國街頭出現生菜比堅尼小姐、日本推出別有用途嘅神奇底褲，同埋英國就有惹火啫喱摔角賽，同樣誘人得嚟又可令人深思。
天氣愈嚟愈熱，海灘上隨處可見身穿比堅尼嘅性感女郎，只係喺美國洛杉磯街頭驚現生菜比堅尼，呢個機會卻唔係咁常見。原來呢班性感女郎並非想賣弄身材同引人注目，而係為咗動物而出一分力。生菜比堅尼女郎（Lettuce Ladies）為善待動物組織（PETA）發起嘅活動，目的係提醒大家善待動物同提倡素食習慣。事實上，除咗美國外，吉隆波亦喺早前舉辦過同類活動。當然，講性感同養眼，就唔可以唔提去年著名巨乳模特兒Courtney Stodden，喺美國進行呢個活動時，所穿着嘅嗰套生菜比堅尼，不但騷出佢激凸嘅車頭燈，一對美腿更係令人流晒口水。
如果一個大男人突然從袋中拎出一條女裝底褲，相信九成九嘅人都會覺得佢變態，只係若然佢拎出呢條底褲就唔同睇法。事關呢條底褲係日本最新推出嘅扭蛋系列「瓶子的底褲」。顧名思義，設計成女裝嘅小底褲並非畀人着，而係用嚟套喺塑膠飲品樽嘅底部，目的係避免冷凍咗嘅塑膠樽上凝結嘅水珠，流晒出嚟整濕張枱。成個底褲系列共有七個款式，分別有白色蝴蝶結、圓點、喱士、豹紋、士多啤梨等等，每個扭蛋價錢為200日圓（約13港元）。雖然佢個設計咁貼心，但唔少日本男網民卻坦言唔夠膽用，皆因條底褲實在太像真，驚畀人誤會咁話。
早排英國劍橋大學莫德林學院嘅男子飲酒社團The Gentleman Wyverns宣布，喺本月14日將會舉行停辦兩年嘅比堅尼啫喱摔角比賽「Bikini Jelly Wrestling」，即刻引起女學生嘅不滿。佢哋雖表示摔角係體育比賽，玩法又夠晒養眼，但喺好多人眼中卻係歧視女性嘅活動，因此喺兩年前被1,174名學生聯署反對下被迫停辦。其實呢個社團出名搞搞震，經常玩埋啲男女踩界嘅嘢，一直以嚟係唔少人嘅眼中釘。其實想玩啫喱摔角唔使搞到咁討人厭，好似喺上個月初美國亞利桑那州嘅圖森市，就舉辦第28屆啫喱摔角大賽，只係佢哋嘅目的並非賣弄色情，而係為咗預防及醫治愛滋病籌款，你話幾咁有意義呢！
撰文：魂