成日活於自己嘅幻想世界當然唔好，但偶爾有性幻想會為性生活帶來情趣，英國有九成夫婦都贊同。要增強性能力好多人都會選擇進補，然而做運動亦係一個有效方法。邊個國家嘅男人最性感？香港女仔就會話係韓國，而美國女仔就覺得愛爾蘭男人最性感。
一個人冇夢想同鹹魚有咩分別？其實幻想亦同樣重要。早前，英國情趣用品銷售網Lovehoney.com就邀請咗1,300位成年男女接受問卷調查，希望得到性幻想相關資料。結果發現97%男女都認為性幻想有效增加性生活樂趣，但係佢哋又有冇坐言起行，將幻想化為現實呢？81%女性及71%男性表示會坦率地將自己嘅性幻想同愛侶分享，呢個絕對係增進感情以及床上樂趣嘅重要一步。而60%受訪者話曾經幻想玩綑綁，後來的確同床伴試過；另外就有約一半試過同伴侶玩角色扮演，將幻想實現出嚟。不過，六成受訪者認為太多性幻想會令人有非現實性愛期望，大家性幻想都要適可而止呀！
早前有報告話做運動對減肥作用不大，但係就唔否定運動對身體健康帶來好處，其實運動唔單只令身體強壯，仲話可提升性功能。劍橋大學一位學者出咗本書《Sex by Numbers》，當中揭露咗好多同性有關嘅數字。經過走訪世界多個地方，為15,521位成年男性量度過命根尺寸之後，發覺那話兒勃起嘅長度平均為5.2吋。另外，手大、腳大、鼻大嘅男人唔代表佢哋嘅命根同樣大，之但係生得比較高嘅男人下面就會相對較長喇。訪問過歐洲44個國家共一千一百對夫妻之後，顯示出佢哋平均嘅做愛時間為9分鐘。喺眾多受訪男士當中，有長期運動習慣嘅人喺性功能測試得分較高，最高嘅一位每星期運動時間為18小時，平均每日有兩個多小時運動。
讀萬卷書不如行萬里路，去旅行除咗可以飽覽山水名勝，對於好多人嚟講仲係一個結識異地戀人嘅大好機會。最近美國一個叫做MissTravel.com嘅網站，訪問咗66,000名女性以及44,873名男士，以了解佢哋認為邊個國家嘅男女最性感最吸引，睇吓我哋港男喺美國女仔心目中嘅地位有幾高先！眾多女性受訪者，認為最性感男人嘅三甲分別係愛爾蘭、澳洲以及巴基斯坦，香港呢？真係對唔住！喺呢次調查當中完全冇美國女仔投我哋一票。至於美國男士認為最性感女性嘅頭三位，分別係亞美尼亞、巴巴多斯以及美國，香港女仔同樣冇份。睇嚟我哋香港人除咗以好客精神招呼外國遊客，仲要提升內在美喇。
撰文：賢