有謂人言可畏，做人最怕就係畀人唱，喺學校如是，喺辦公室亦如是。之不過，把口生喺其他人身上，人哋鍾意點講就由得佢哋囉！實在唔需要太計較，好似尾崎奈奈咁正因為人氣與日俱增而被人中傷，幸好奈奈生性樂觀，驚都未驚過！
人無百日好，花無百日紅，好多女明星今日睇到佢個樣咁省鏡，身材又咁弗，難保多年之後唔會走晒樣。若然能夠喺十年後都能夠保養得宜，好似尾崎奈奈咁雙峰依然咁吸引，個樣仲愈來愈索，咁就真係難能可貴喇！今年32歲嘅尾崎奈奈同好多年過三十嘅水着妹如杉原杏璃、森下悠里一樣，年紀愈大，吸引力愈強，難得嘅係奈奈除咗俏麗可人，且保留一股青春少女至有嘅可愛萌味，唔講仲以為佢今年只係二十出頭。奈奈嘅身材同美貌一樣違反時間定律，34-23-34嘅弗爆胴體曲線玲瓏，肌膚真係好似美白產品廣告所謂嘅剝殼雞蛋一樣幼嫩，胸前對G奶依然保持飽滿、堅挺、鮮嫩，唔怪得人氣有增無減，工作仲接個不停啦。
尾崎奈奈出道拍寫真憑住心口對G奶而打響名堂，仲好快得到電視台以及電影界向其招手，近期演出嘅電視節目有《激走2700km!東南亞縱橫 長距離巴士之旅》，電影方面亦有《土龍之歌 潛入搜查官REIJI》。奈奈當初加入藝能界嘅夢想，就係希望可以學安達祐實咁喺影視圈成功發展。之不過，人紅自然多人眼紅，早前就有人攞出奈奈以前嘅寫真作品，更指出當年佢塊面又圓又闊，同家陣完全唔同，有整容之嫌。另一方面，仲指出佢曾經拍過三點盡露寫真，然而奈奈勇於面對，表示的確拍過裸照，至於整容就冇咁嘅事。之後，有報道指奈奈多次獲邀演出綜藝節目《倫敦Heart》係靠肉誘男主持有吉弘行，仲話拍到佢哋一齊返屋企過夜嘅相片。之不過，傳聞好快就被打破喇，因為有次有吉弘行喺節目中出現，奈奈好開心衝前想擁抱一番，點知佢居然施展一記過肩摔，將奈奈撻到飛起，證明二人並無感情瓜葛。
尾崎奈奈熱中將生活點滴透過博客同大家分享，想更加了解奈奈，不妨多加留意其博客。
網址：http://ameblo.jp/ozaki-nana/
年齡：32歲
身高：5呎4吋
三圍：34G-23-34
撰文：賢