離不開，留不低，假如係兒女私情都還好，起碼你毋須同人交代，甚或火速溝過第二個填補空虛，但若然係囡囡加入脫星界，諗住搵夠上岸，嫁人又好，轉型做藝人都好，結果原來都係冇好結果！被喻為最索爆印度脫星Sunny Leone，兩年前堅決離開四仔界，但直到今日有關阿妹嘅四仔新聞依然停不了，當事人坦言感到非常困擾，呢啲咪叫「成也脫星，敗也脫星」囉！
曾經喺美國四仔界紅到發紫嘅印度西施Sunny Leone，於2009年下嫁同鄉搖滾歌手兼富二代Daniel Weber，直到2013年阿妹決定修心養性，結束12年脫星生涯，返家鄉印度拍大電影，擔正過幾部歌舞大片，同時阿妹亦接拍多個廣告、客串演出多位歌手MV，更乘老公之便做埋歌手，又上電視台做主持談情說性，真係百足咁多爪呀！Sunny仲將美國情趣文化帶返家鄉，搞咗個專為「保守派」印度人而設嘅情趣用品網站，不過反應一般，家陣已經冇再更新。至於平日阿妹同老公恩愛非常，佢哋兩個嘅Twitter有過百萬人關注，日日夜夜都係合照合照同合照，尤其係佢老公，每次Po相都係索爆老婆Sunny嘅靚相，真係羨煞旁人！
但原來幸福嘅背後，阿妹卻一啲都唔開心，早前成人新聞網站XFANZ報道，印度嗰邊有人投訴Sunny嘅個人網站渲染色情，觸犯當地法例，亦無喺首頁標明網站含有色情成分，任何人士登入都可以免費瀏覽大量色情資訊，絕對有教壞細路之嫌！
至截稿前為止，Sunny未有就此作出回應，但可以想像佢都幾頭痕！其實阿妹早就鐵了心離開四仔界，依家喺印度已經係大明星，至於點解唔刪除個人網站，相信係合約未完有關。而咁啱得咁蹺，Sunny妹呢期有新戲《Kuch Kuch Locha Hai》上映，究竟係咪宣傳伎倆呢？咁就不得而知。
另外，Sunny早前接受網站「nytimes」訪問時表示，喺傳媒或大眾眼中始終都搣唔甩脫星身份，因而令到佢好唔開心，希望大家嘅焦點放喺佢嘅電影事業上。唉！冇計啦！一日脫星，一世脫星，好在Sunny有老公錫錫，嚟緊佢哋兩公婆仲首次喺大銀幕合作，拍攝歌舞電影《Dangerous Husn》，齊齊做男女主角，最快於今年年底上映，唔知香港有冇得睇呢？
撰文：祖