正所謂耳聽信三分，眼見未為真，有人就話有圖有真相，究竟乜嘢先至叫做真呢？其實呢個世界有啲事，就算有圖都仍令人覺得奇怪，就好似德國有個人體彩繪藝術家畫一啲唔暴露嘅彩繪；新加坡咁嚴肅嘅國家竟露出成風；而內地竟有名男子當眾幫假女友沖涼，真係信不信由你！
裸模加人體彩繪，有色之士一聽到呢兩樣嘢加埋，即刻有晒反應，只係大家唔好諗多咗，事關裸模同人體彩繪加埋一齊，未必係色情而係可以藝術到根本乜嘢都睇唔到！德國49歲嘅藝術家Joerg Duesterwald，早喺1993年4月1日開始創作人體彩繪，出色嘅技藝早已備受認同。早前佢喺位於德國西部嘅Langenfeld森林展出精湛嘅人體偽裝技藝，佢先讓裸模喺森林中嘅岩石或樹幹旁擺好動作，然後再用幾粒鐘喺裸模身上塗上顏料，等佢哋徹底融入森林環境後再進行拍攝，結果就變成家陣嘅一啲都唔裸露嘅裸照。唔知各位有冇覺得失望呢？
新加坡呢個國家對好多人嚟講，係個家長式管理嘅地方，理論上人人都循規蹈矩，卻估唔到近排當地野外露出成風，搞到當局相當頭痕。事緣最新網上流傳大批火辣野外露出照，照片中已被打晒格仔嘅裸女，喺公共場所玩露出，地點包括停車場、火車站、公園，甚至公路路旁。據有關當局表示，呢啲相片喺唔同嘅時間拍攝，而警方將會加緊追查邊個咁大膽。有網民分析完呢啲照片就指，從片中女子嘅外形嚟睇，佢哋有可能係外國遊客，之但係並無實質證據支持。其實呢啲野外露出相早喺2013年已經有流出，只係近嚟數量愈嚟愈多，究竟邊個咁百厭鍾意喺街外露體呢？
外國人就話情趣玩具當家品，只係喺中國人社會，絕大部分嘅人都唔想畀人知佢玩或者擁有情趣玩具。不過內地就有位男子唔單止喺眾目睽睽之下，拎咗個吹氣公仔出嚟，仲要幫呢位哎吔女友喺河邊沖涼添！話說喺今個月10日，河南鄭州嘅南陽光武大橋附近，有個男人喺河邊幫吹氣公仔洗白白，縱然唔少路人喺度睇，佢都好從容咁慢慢洗。咁出位嘅行徑引嚟不少網民謾罵，但亦有唔少網民大讚佢係好男人，而理由係現實生活中絕少男友會幫女友沖涼，好似佢咁用心、細心兼落力幫哎吔女友沖涼，仲要唔理眾人嘅目光更係少見喎！
撰文：魂