漫誘引力：淚眼煞星 有血有「肉」

名家名作

本地漫畫界唔少作品都由小說改編，就算冇原著故事，畫作同故事都可以分為兩個人或部門負責。而喺日本漫畫界情況亦相當常見，好似憑《北斗之拳》成名嘅漫畫大師原哲夫咁，就經常配合作家武論尊創作漫畫喇。而今日為大家介紹嘅《淚眼煞星》，就係漫畫大師池上遼一同作家小池一夫合作嘅經典之作喇。池上遼一對於好多資深漫畫迷絕不陌生，佢除咗《淚眼煞星》出名，《男組》、《傷追人》、《英雄本色》都是膾炙人口嘅大師級漫畫作品。據講池上遼一係做廣告招牌出身，後來得到《鬼太郎》作者水木茂欣賞並招為助理，於是從水木茂身上學到好多關於漫畫繪畫同做人道理。池上遼一嘅作品雖然成功，但佢坦言冇創作娛樂性作品嘅才能，故要靠原作嚟繪畫，可能因為專注發揮畫功，令漫畫特別精美兼具真實感，可謂有血有肉。

連場激戰

池上遼一嘅作品唔少都加入色情元素，《淚》就係充分將劇情同色情元素融合嘅好例子。故事講男主角火野村窯係陶藝家，某次發現黑幫組織「百八龍」嘅殺人片段，後來被組織派人綁架同催眠，並訓練成為一級殺手，綽號自由人，而佢嘅特徵就係一身龍紋身，而殺人之後總係流下兩行熱淚，及後嘅故事就講自由人點樣登上百八龍幫主寶座、平息幫內糾紛以及面對敵對組織挑戰。自由人嘅戰鬥過程激烈過癮，血腥畫面絕對可以滿足好此道漫畫迷嘅需要。另一方面，佢生得高大靚仔，而且仲相當風流，行事……應該係房事絕對唔會掩飾自己嘅本能需要，不時同敵對嘅女角互相挑逗繼而作床上激戰，以優秀嘅調情及交歡技巧搞到對方甘心屈服，而呢班女敵人好多都係風騷又豐滿嘅惹火尤物，睇見佢哋畀自由人搞到欲仙欲死，讀者每每大呼過癮！

撰文：賢