近期興玩3D打印，連四仔界亦玩埋一份。德國一間公司同脫星合作推出3D Figure，本來件事好正，可惜實物醜到冇朋友，難得班脫星仲笑騎騎，夾實波罅力撐，莫非當四仔迷傻嘅？
以往脫星為咗報答粉絲支持，不時推出紀念品，甚至拍賣二手胸圍底褲畀粉絲留念。唉！可惜家陣脫星為咗搵銀愈嚟愈無良心囉！話說最近德國一間3D打印公司同脫星合作推出Figure，分別有1：5、1：10及1：15三種Size選擇，滿足不同粉絲需要，售價由49至199美元（約382至1,552港元）不等，更有推出限量版，售價499美元起（約3,892港元)。價錢唔算平，以為手工好精美，點知細佬上官網睇過，坦白講，醜到嚇人囉！
該公司早前接受傳媒訪問時表示，只挑選有地位、有名氣、有性格及對業界有貢獻嘅脫星合作，目前有12位，包括美國潮吹王后Bonnie Rotten、自居性學教授脫星Jessica Drake、意大利中女Roberta Gemma等。據知呢間公司獲得美國四仔大廠Wicked Pictures全力支持，怪唔得隔咁遠都咁快傾得成合作，而成班脫星亦瞓身剝衫力撐啦！
其實巴打買脫星Figure冇問題，問題係點解啲公仔可以咁醜都推出街先？不過，該公司表示佢哋好用心去做，用上多達100部單鏡反光相機幫脫星拍攝立體影像，然後再由成Team人去合成兼修改，咁做出嚟嘅效果應該好靚，但事實上係不堪入目，就以人氣最爆嘅「蜘蛛女」Bonnie Rotten為例，阿妹現時推出兩款Figure，細佬所見，除咗紋身跟足原著，眼耳口鼻都好肉酸，令人攞上手嘅勇氣都冇囉！而限量版售三千幾港元，你話係咪過分先？
官方又話，所有Figure睇得唔郁得，摸得唔食得，只適合12歲以上人士購買，貨品可以運送全球，細佬Check過，連香港都可以直送，你有興趣冇？若然你咁都接受，上網買搞掂，最快7日送到府上！
如果你唔只想買脫星Figure，仲想為自己整番個Figure，無問題！呢間德國公司幫到你，皆因佢哋提供為客人度身訂造3D Figure服務，收費按比例計算，由最細尺寸1：5售219美元（約1,708港元），至1：10售539美元（約4,204港元）不等，最激造型着條底褲就得，至於加手錶、眼鏡或飾物等就要額外收費，詳情可上網(目及)(目及)。
網址：http://eroticart-shop.com
撰文：祖