最近美國有網站邀請網友分享自己精心打造，內裏布滿情趣用品、器具嘅家居。荷里活女星安祖蓮娜祖莉嘅厚唇出名迷人，日本藝能界女藝人石原聰美最近被評為擁有第一魔性之唇，故能與之匹敵。去滑雪梗係要着多幾件禦寒衣物，但喺俄羅斯最近就有上千人只係着泳裝嚟滑雪，仲成為健力士紀錄添！
屋企係我哋嘅棲身之所，仲係休息、娛樂、聯誼嘅最佳之地。是以，大家都會將屋企裝修得舒適又貼心，仲有人會將屋企主題化，例如打造到好似原始森林、布滿玩具嘅兒童樂園，喺美國更有人將屋企變成情趣玩具樂園，www.kinkbnb.com就係一個畀大家上載自己精心打造嘅情趣家居相片平台，從中可以見到不少住宅壁上都掛滿皮鞭、手銬、鐵鏈，亦有將梳化變成情侶合歡椅，令人嘖嘖稱奇。網站負責人表示，開設此網嘅目的除希望推動正確嘅性愛觀念，大家仲可以租用網站中出現嘅情趣家居，同愛侶度過一個驚喜又激情嘅假期。
雙唇嘅敏感度有幾高，嘗過接吻滋味嘅朋友應該心領神會。可能因為如此，每當我哋見到女仔嘅嘴仔都會有少少動情之感。最近喺日本就進行一項有關女星雙唇嘅調查，搵來二十歲至四十來歲，合共六百名男性進行投票，睇吓邊個女星擁有「魔性之唇」。好多人都以為冠軍係當紅女星綾瀨遙，不過結果遙妹只係得第二，冠軍就由現年28歲，曾經憑電影《我的爺爺》囊括多項新人獎嘅石原聰美獲得。知名偶像評論家高倉紀文就表示聰美嘅雙唇無論色澤、形狀同厚度俱屬完美，睇到佢講對白嘅時候，都會覺得佢厚厚嘅下唇散發出其他女星所缺少嘅性感喎。
已屆5月，天氣陰晴不定，但係大致上都屬於潮濕溫暖，相信大家出街要換上短袖衫，之但係去俄羅斯就唔好咁做喇，因為當地仲有地方寒冷非常，知名滑雪勝地克麥羅沃州仲有雪落，令唔少滑雪愛好者喺夏季來臨之前仲有機會過癮一番。早前當地一個滑雪場舉行泳裝滑雪活動，吸引咗1,835名男女以火辣泳裝登場，打破2013年一屆所創造嘅500人紀錄，並成功被列入健力士紀錄大全添！見到大班比堅尼美女於雪地上玩得咁奔放，真係由心熱到出嚟呀！
撰文：賢