經常有人話十八禁漫畫畫出嚟嘅嘢都係假，想睇情慾肉搏不如睇AV好過。如果按照呢個講法，漫畫早就被電影所取締。其實佢哋兩者之間嘅分別，在於漫畫畀到人更大嘅想像空間，內容更可以天馬行空，就好似今次介紹嘅呢位近年冒起極快嘅日本成人漫畫家六角八十助，佢嘅首本短篇漫畫集《Sex Works! 全身都是敏感帶》，就可以滿足到大家唔同嘅幻想。
呢位喺2012年8月於日本著名成人漫畫雜誌《失樂天Comic》出道嘅漫畫家，最擅長嘅就係繪畫美少女嘅身材，事關其筆下嘅女角個個身材都相當豐腴，亦因為呢個原故，佢哋嘅三圍往往都偏向誇張，不但一對車頭燈分量十足，盛臀更係相當有壓迫感，尤其係當女主角玩騎牛牛時，激凸嘅身材令畫面更加動感十足，加上相當穩定嘅畫功而備受好評。另外，佢最拿手嘅就係掌握情慾場面出現嘅時間，須知道睇成人漫畫，目的都係想睇到香艷又激情嘅肉搏場面，而佢往往喺最恰當嘅時候將劇情帶到床戰之中，唔使大家一邊睇一邊諗究竟幾時先至到戲肉，如此精確嘅掌握，難怪佢出道只不過係兩年多嘅時間，就可以推出個人首本短編成人漫畫集《Sex Works! 全身都是敏感帶》。
書中收錄咗自佢出道以嚟11個成人漫畫短篇故事，更有部分係從來未發表過，題材亦相當多元化，當中包括講述學園初戀故事嘅《因為人家是你女友嘛！》、海灘浴室奇遇嘅《投幣式性愛》、女僕與主人突發情慾關係嘅《被褥房》等。不過講到最令人印象深刻嘅故事，則要數《醉醺醺大作戰！》。故事講述男主角八尾為咗搞派對，於是去雜貨店入咗大量啤酒同零食，巨乳女店員菊池見佢拎唔晒便主動幫忙搬貨。點知喺送貨途中卻見到有對情侶喺大廈暗角曳曳，火辣場面竟燃起菊池嘅慾火，於是主動挑逗八尾，而兩人就咁開始交戰起嚟。到咗第二日，八尾出街時又遇到正要開貨車送貨嘅菊池，對方強拉八尾上車，跟住落嚟係點相信大家都估到。出色嘅分鏡加上精彩嘅交鋒，絕對值得大家一睇再睇！
撰文：魂