日文中嘅尻解做屁股，而燒尻兩個字加埋一齊即係燒屁股是也，只係呢個位於日本北海道嘅海島「燒尻島」，卻同燒後欄一啲關係都冇，大家千祈咪諗多咗！更咪以為呢個島只得啲亂石，畀太陽曬到熱辣辣可以燒着後欄，查實佢憑住綠色環境，而成為相當著名嘅自然生態旅遊景點。
位於北海道留萌支廳苫前郡羽幌町以西25公里嘅海島，面積有成5.21平方公里，住有島民三百幾人，因島上有呈原始狀態嘅森林，並有眾多花卉同雀鳥棲息關係，因此喺1990年8月1日同暑寒別山地、雨龍沼濕原、天賣島等，一齊被定為暑寒別天賣燒尻國定公園。乜嘢叫做國定公園？即準國家公園咁解，而從呢點足見呢個名字惹人遐思嘅海島，風景有幾咁迷人。
撰文：魂