要數今年12星座中最冇運行兼亂七八糟嘅，一定非金牛座嘅朋友莫屬，因為今年受到土星遠離嘅影響，佢哋突然間好似冇晒主見，如果呢年內有異性主動地向佢哋投懷送抱，佢哋都一定會中招，感情生活肯定凶險萬分！
今個4月至5月頭，同埋10月至年尾，金牛座嘅朋友都要特別小心，因為本身係放電高手嘅你，平時都已經輕易吸引異性埋身，但到咗以上日子，異性運會特別強烈，埋你身嘅異性多到你都唔相信。除咗新朋友之外，一啲認識咗多年嘅朋友或者舊相好，都會畀你再遇上，而且好有機會產生戀情或者舊情復熾，認識多年都冇發展或者分咗手嘅前度，再喺埋一齊究竟係咪好事呢？真係要自己好好去考慮清楚，單身嘅朋友惹上呢啲爛桃花，最後唔啱頂多分手，亦冇乜所謂！但如果已經有另一半嘅，呢啲爛桃花出現你哋真係咪心軟，否則一定會陷你哋於萬劫不復之地，到時恨錯難返。但好彩金牛座嘅朋友本身比較理性，希望大家能用理性去處理好感情嘅問題！
此外，單身嘅金牛座朋友今年雖然紅鸞星動，桃花不斷，但你哋反而對情情愛愛會冇乜反應，處之泰然，身邊當真係有異性出現時，肯定冇你身邊嘅朋友表現得咁雀躍，呢個反應係十分正常，因為你預感到眼前事，十之八九都係爛桃花，所以你嘅心態比較會淡然處之，當道氣一過，狂蜂浪蝶就會離開，如果仲肯留喺你身邊嘅，呢個自然係真命天子，但要等呢道氣過要捱到下年至知分曉。至於已婚嘅金牛座朋友，今年大可放心，你對家庭嘅執着，相信冇人會質疑，但由於對方係會主動出擊，你雖然無夢，但對方有心，小心因愛成恨嘅人，因為你嘅拒絕走嚟破壞你夫妻嘅感情。所以今年除咗萬事小心外，仲要好好與另一半建立互信關係，唔好畀第三者輕易破壞彼此感情。
4/20-5/20
狩獵運：4
甜蜜運：3.5
戰鬥運：4
最佳數字：1、3、9
最佳顏色：紫色
最佳寶石：紫水晶
最佳位置：高級餐廳、古堡
撰文：小德