喜愛夜蒲嘅朋友，喺夜場識到異性，如果情投意合可能會跟對方發生一夜情，好多朋友事後水過不留痕，十分瀟灑，但亦有好多朋友玩到惹得一身蟻，後悔莫及，師傅今日就同大家講講乜嘢生肖嘅朋友絕對不宜玩一夜情。
師傅話屬猴嘅朋友最麻煩，因為佢哋天生多情又愛玩，每晚唔去夜店玩都唔安樂，所以一夜情經常會發生喺佢哋身上，本來都冇乜嘢事，但佢哋一旦愛上咗對方就麻煩啦！屬猴朋友多情嘅性格，只要一愛上對方就會死纏爛打，係要追到對方為止，完全破壞晒一夜情嘅遊戲規則，最後就會換嚟徹底嘅失望同埋絕對嘅痛苦，所以屬猴嘅朋友要小心，揀對象結婚生仔同埋搵一夜情伴侶，最好分開唔同地方搵，撈埋一齊最後痛苦嘅只有係你自己！
屬羊嘅朋友一夜蒲就麻煩，因為佢哋對愛情充滿幻想，而且富有責任感，對方只要有少少表示，佢哋可以幻想一大堆嘢出嚟，以為對方愛上自己。如果相識第一晚就發生關係，佢哋會諗到要同對方結婚生仔，計劃一生，再見呢位一夜情人時就會百般苦纏，同樣係違反一夜情嘅遊戲規則，所以屬羊嘅朋友真係咪發生一夜情，好在佢哋比較唔喜歡夜蒲，所以自找麻煩嘅機會甚少，但有朋友係屬羊嘅千萬咪搵佢哋去夜蒲，否則朋友出事你都有排煩！
屬龍嘅喺朋友圈中，天生就係萬人迷，如果出現喺夜場，佢哋更會有股魔力吸引大批異性圍着佢哋嚟轉，而且佢哋對愛情常抱輕率任性嘅心態，所以佢哋搞一夜情嘅機會十分之大。如果係夜蒲老手，就更深知遊戲規則，絕對唔會出事，但佢哋偏偏會吸引到屬猴、屬羊嘅麻煩異性，令佢哋煩惱不斷，所以師傅話唔想煩惱，建議一係少啲夜蒲，一係就不斷轉場嚟玩，如果唔係隨時會有幾個愛慕者同時出現，搞到你冇晒桃花運行之餘，仲會麻煩不斷添。
異性運：鼠、兔、狗
桃花運：牛、馬、豬
和合運：虎、猴
撰文：小德
玄學提供：寶源師傅