女子徵求壯男，搞到加拿大囡囡要出聲明澄清，有冇咁誇張呀？喺日本歌舞伎町做皮條客嘅男子，一生為性事打拚，最近仲想為政治打拚。英國專家建議大家千萬咪罵人肥，因為佢哋唔會被罵瘦，反而會愈罵愈肥！
俄羅斯有個29歲靚女，因為被佢阿媽「瘋狂逼生」，係生仔個生，並唔係逼婚，所以囡囡就喺網上誠徵壯男，令佢一索得男解決困境，消息傳開後，立即引起各國媒體爭相報道，本來誠徵壯男冇乜特別，但有個住喺加拿大嘅23歲嘅女子，因為同名同姓關係，被人誤認為當事人，面書幾日間多咗9,000個追蹤者，而且出位嘅短訊更層出不窮，最後焗住錄段短片放上網澄清，內容係感謝大家嘅支持和愛戴，佢仲年輕，唔想做媽媽，希望大家唔好再誤會！
中國人去到日本嘅歌舞伎町玩，一定會遇上啲會講普通話嘅皮條客，有佢哋帶路真係方便好多，其實呢啲皮條客嘅鼻祖就係現年54歲嘅李小牧，已經喺日本打滾咗27年，近年更入咗日本籍，由於同歌舞伎町有着深厚嘅感情，所以決定參加嚟緊一屆新宿嘅區議員選擇，據講有60人爭奪38個議席，佢嘅機會可謂一半一半，被喻為「日本討生活的中國皮條客」，佢嘅競選口號也不忘性事，「我要當一個性事家，也要當個政治家」真係豪情壯語！
英國有位肥胖專家搵嚟五千個肥人做統計，發現肥胖嘅人無論男女，如果被親朋戚友愈鬧佢哋肥，佢哋竟然會繼續肥落去，好似詛咒咁，相反好少人會因為被鬧而減輕體重，所以呢位專家呼籲各位唔肥嘅朋友千萬咪成日鬧啲肥胖嘅人，因為愈鬧佢哋反而會愈自暴自棄，收埋自己喺屋企運動機會自然大減，加上情緒容易波動，於是會化悲憤為食量，令食量大增想唔肥都唔得，而且呢位專家仲想立法保護肥人，唔可以出言辱罵佢哋，到時講句肥仔都聽踎監！
撰文：小德