女人出軌原來唔關佢事，元兇係基因嘅問題，但唔知老公會唔會認同呢？至於流感高峰期，有醫學專家話接吻冇問題，唔知大家又會唔會冒險咀嘴呢？至於好多男人都喜歡翹臀嘅囡囡，科學家話只係貪佢哋大肚都仲做到嘢！
澳洲昆士蘭大學嘅心理學專家指出，女士紅杏出牆原來同基因有關，佢哋搵嚟7,378名男女，攞咗佢哋嘅DNA樣本同埋生活史，發現當中曾經出軌嘅女士基因都與正常人唔同，專家話主管人類性生活嘅其中一組基因叫做AVPRIA，如果有變異就會影響人不滿於婚姻內嘅性滿足，而調查中曾經出軌嘅女士AVPRIA基因都呈現變異，所以假設出女人紅杏出牆係天生嘅，但好奇怪，出軌男人嘅AVPRIA基因冇反應，可能花心基因已經早就融為一體，唔使變異都會花心！
最近流感大爆發，好多情侶都唔敢錫錫，怕會交叉傳染，早前就有藥廠做咗個調查，發現46%嘅人有感冒就拒絕接吻，當中女性佔70%，而男性就只有44%，但係咪唔接吻就冇事，一接吻就有事呢？據醫學教授指出，除非接吻時向着對方咳嗽，否則接吻係唔會受感染，相反，由於咳嗽或打噴嚏都會用手嚟輕掩，雙手殘留更多病菌，所以情人拖手反而更易受到感染，但有網友就話脷疊脷濕吻都冇事，打死都唔信！咁真係要先搞清楚接吻嘅定義啦！
科學家真係好無聊，美國有大學對女人嘅屁股做咗個調查，解釋男人點解咁喜歡翹臀嘅囡囡。佢哋估計男士喜歡嘅並唔係大屁股，而係腰椎嘅傾斜角度，只要腰椎曲線達到45.5度就會吸引住男人嘅眼睛，佢哋用囡囡唔同嘅彎腰角度照片嚟畀調查員選擇，覺得45.5度係最吸引嘅竟有三成人認同，所以科學家再進一步推斷男人喜歡呢個角度並唔係因為美觀，而係嚟自遠古記憶，因為擁有45.5度嘅囡囡懷孕時唔會影響日常工作，所以自此成為男人嘅至愛！
撰文：小德