紫色向來予人浪漫同戀愛嘅感覺，故此有人稱佢做情愛嘅顏色，而情到濃時自不然會發展出超友誼關係。既然係咁，唔知有乜嘢情慾詞語會同紫色及Purple有關呢？以下就為大家網羅咗幾個既有趣又特別嘅詞語，等大家開吓眼界。
「Purple Heart」唔係解作紫色嘅心，而係一種情濃男女打茄輪時留低嘅印記，即係我哋成日講嘅「咖喱雞」是也！不過，其實「Purple Heart」係英文嘅俗語，正式嚟講佢應叫做Hickey。既然講開咖喱雞，唔知大家知唔知佢嘅學名叫乜嘢呢？答案就係機械性紫斑。當甲方喺乙方身體表皮上吸啜時，口腔內呈現因真空狀態而產生壓力唔平均，故此導致皮膚微血管破裂。咖喱雞雖過癮，但大家千祈咪亂啜，事關喺2011年1月時，新西蘭就有一名44歲婦女因為幾日前頸上嘅咖喱雞，搞到產生凝血現象，血塊流到心臟後，出現輕度中風而令左臂失去知覺。
如果對日本熟女AV情有獨鍾嘅巴打，一定唔會唔聽過紫彩乃呢個大名。呢位喺1969年3月29日出生嘅女優，喺2003年成為日本AV片商Million專屬女優。當時已34歲嘅佢以熟女形象出道，憑住豐腴嘅身材加上一對35F嘅激凸車頭燈，好快成為當時嘅熟女女神！不過喺2006年10月5日由於患病關係宣布引退。及至2009年10月復出，可惜一個月後因舊病復發再次引退，然後又喺2010年10月改名做夢乃春香再一次宣告復出，可惜隨住健康轉差同年華老去，喺今年1月宣布正式引退。喺好多人眼中，佢係個潮吹兼淫蕩嘅熟女，其實鏡頭以外，曾於法國巴黎讀大學嘅佢精通法文同英文，而書法同鋼琴更係有專業認證，名副其實係個才藝之人。
有時運氣啲嘢真係話嚟就嚟，好似喺1991年美國推出嘅四仔作品《Purple Haze》就係一個好例子。呢套由四仔片商Western Visuals推出嘅作品，當年搵嚟著名脫星Alexandra Quinn、Kimberly Kane、Nikki Knight等演出，只係作品喺當地並無得到太大嘅關注。點知佢流到當時嘅蘇聯後，竟然引嚟相當大嘅哄動，至今仍被東歐及俄羅斯嘅四仔迷視為經典。事關對當時嘅蘇聯男士嚟講，呢套講述應召女郎嘅作品題材相當新穎，並且可以帶領佢哋走入一個從未諗過嘅情慾世界，最重要係套片分成8幕，而每幕玩嘅嘢都唔同，難怪佢哋咁Like呢套作品。
好多人見到「Making Purple」呢個詞語時，都會覺得相當奇怪，事關按字面嚟解嘅話真係唔知乜嘢意思，查實佢係曳曳咁解。呢個俚語嘅出現其實幾有趣，皆因講到代表性別嘅顏色時，男士係藍色，女士就係紅色，當呢兩種顏色溝埋一齊時會變咗做紫色，因此引伸出曳曳嘅意思。據英國Newcastle University喺2007年所發表一個關於性別顏色嘅研究發現，用藍同紅色嚟代表男女性別係有佢嘅原因。話說喺人類處於狩獵時期，女性多從事採摘果實工作，而搵到紅色亦即代表成熟果實嘅本領，可有助提升佢哋嘅社會地位，呢種本能流傳至今便促使佢哋偏愛紅色。
撰文：魂