處女座嘅男士出晒名怕醜，特別係見到心儀嘅囡囡時就會特別緊張，準備好嘅愛的表白，突然間會忘記晒，所以食白果無功而還嘅情況經常發生，而喺2015年係最好運嘅一年，如果唔好好把握機會，蘇州過後就冇艇搭啦！
今年命宮有金星和木星兩大吉星拱照，運氣真係不錯，工作同財運都比上幾年好，就連一直冇乜起色嘅愛情運都大有幫助，已經拍拖嘅朋友，無論男女今年只要抽多啲時間陪吓另一半，多啲溝通同氹吓對方，感情就會有唔錯嘅發展，如果想結婚嘅，因為木星入夫妻宮，所以係絕佳嘅時間，但如果仲係單身寡仔嘅朋友，今年要有所突破，要留意三件事，由於工作好忙，所以你會去好多唔同嘅地方，有兩個地方一定要留意，另一半就可能藏喺嗰度，分別就係別人公司同埋受訓嘅地方，你嘅真命天子就會喺呢啲地方出現。由於係人哋主場，所以冇得慢慢食，如果一睇啱就要即時出手，雖然同你嘅個性好唔同，但要抱得美人歸，改吓壞習慣都要，否則機會一過就冇運行啦！
第二點要留意嘅就係自己把口，無論你平時係咪靠把口搵食，但一見到自己喜歡嘅人，你即時就會變得沉默，你嘅男女朋友自然了解你性格，但如果只屬暗戀對象，你唔講，唔表白，人哋又點知道喎！所以當有機會表白時，就要好好把握，太多開場白或者太多暗示都唔好，一於明刀明槍，直來直往，被人拒絕嘅話，就疊埋心水搵過第二個，免得浪費彈藥！最後一點係小心啲是是非非或者謠言傳聞，例如你喜歡某秘書，但收到風佢跟老闆一齊，呢啲傳聞你千萬咪信，一於照追，船頭驚鬼船尾驚賊嘅心態千萬咪有，否則誤人誤己，對方一日未講清楚，你都咪被呢啲謠言所誤導。總之今年係處女座朋友感情發展年，如果唔識得把握機會，下年運勢一轉，又唔知要等幾多年！
狩獵運：3★
甜蜜運：4.5★
戰鬥運：4.5★
最佳數字：1、5、9
最佳顏色：綠色、青色
最佳寶石：綠粉晶
最佳位置：學校或培訓中心
撰文：小德