相信已經有另一半，正在熱戀中嘅巴打們，喺乙未年嘅感情事上最擔心嘅，就係感情會唔會有變，拍拍吓拖甩拖。所以今日搵嚟師傅講解一下邊幾個生肖最容易分手，等大家可以及早提防，趨吉避凶！
師傅話猴年巴打今年冇乜桃花運，但勝在人緣運好，所以身邊不乏異性出現，如果本身條命異性貴人較多嘅，佢哋喺今年就會不時出現，幫助你喺工作或事業上得到唔錯嘅發展，但係小心人哋對你好，未必係喜歡你，如果你表錯情，拋低自己嘅另一半走去追求異性貴人，除咗會弄至分手，更會把貴人嚇走，到時人財兩空，真係後悔莫及，所以屬猴嘅朋友見到女人咪心猿意馬，特別係已經有拖拍嘅巴打們，更千萬唔好三心兩意，否則後果自負！
屬龍朋友今年一切事都會很平穩，感情生活亦一樣，但係適逢驛馬入命，所以會比較奔波，最常見情況就係工作上有出國發展或進修嘅可能，而且一去可能要去一個月或以上，對於已有女朋友嘅巴打嚟講，感情上會出現嚴峻嘅考驗，所以記緊要同另一半及早商量，不要決定咗至商量，你唔尊重佢哋嘅下場，就會有分手嘅可能，就算避得出國一關，如果你要轉工、調職、搬屋等有變動之事，記緊早啲同另一半商量，否則難免分手收場！
屬牛嘅朋友今年沖太歲，所以有好多事都會逆轉，明明好好嘅男女朋友，轉眼就會大打出手，最終更會弄至分手收場，主要原因係屬牛嘅朋友沖太歲關係，所以失驚無神會有股火氣出嚟，如果要下決定時，就會做出錯誤嘅決定，要拍拖時，就會做出反常嘅行為。另一半忍得到或者自己及時收火就會冇事，否則感情一定會受到影響，所以沖太歲嘅戀人一係分手，一係就結婚，屬牛嘅朋友萬一吵大鑊，求婚可能係挽救呢段感情嘅最後機會！
異性運：龍、馬、猴
桃花運：鼠、兔、羊
和合運：豬、牛
玄學提供：寶玄師傅
撰文：小德