喺唔少人眼中，艷星都係以標致外形嚟賣弄風情同色情，以滿足男士嘅視覺同心理，只係呢種諗法係大錯特錯，皆因喺現實中，確有艷星唔單止外形出眾，演技更係令人激讚，好似喺日活時期冒起嘅永島暎子就係一個好例子。
喺1955年7月28日於日本熊本縣出生嘅永島暎子，早年一直喺呢個南方城市生活。喺熊本縣立八代高等學校畢業後，佢先後到過日本東北嘅一個工場製作木偶及喺北海道嘅一個牧場工作。經過短暫嘅打工仔生活後，喺1976年去到日活電影電視藝術學院，即現時日活藝術學院嘅前身讀書，憑住出眾嘅外形及演技，被挑選為電影《四疊半青春鑲玻璃》嘅女主角，而呢套亦係佢嘅處女作品。當時正值21歲嘅佢，青春無敵得嚟床上戲更係相當到位，配合同佢年齡唔成正比嘅老練演技，將戲中嘅少女情懷演繹得淋漓盡致，令唔少以為艷星僅得外形而冇演技嘅觀眾刮目相看。
不過講到佢成名作，則要數翌年演出嘅《女教師》。戲中飾演一位被強暴女教師嘅佢，跟住捲入倫理、感情同工作等嘅漩渦之中，喺表達戲中人情感之餘，更要兼顧埋情慾演出，難怪有人話如果唔係由佢演出呢個角色嘅話，相信冇乜邊個可以演繹到箇中神髓。憑住呢套廣受好評嘅情慾作品，喺1978年嘅Elan d'or賞中獲得最佳新人榮譽，自此奠定呢位演技派艷星嘅地位。到咗1983年，永島暎子參加經典日本電影《龍二》嘅演出，喺戲中飾演花城圓子一角。雖然佢喺呢套電影中只係一個配角，但仍無礙佢嘅演技發揮，配合艷而不淫嘅情慾戲，令佢喺同年橫掃咗藍絲帶賞、報知映畫賞同電影旬報賞，三個電影頒獎禮嘅最佳女配角。
撰文：魂