作為一個經典嘅色情電影女優，其實作品唔使一定要多，有時只需要一套脫戲就已經令佢成為經典，高田美和就係一個好例子。呢位從出道以嚟一直飾演清純鄰家女孩角色嘅女優，到咗35歲時突然嚟個破格一脫，從此令佢成為日本色情電影嘅經典人物。
原名梶浦美知子嘅高田美和，喺1947年1月5日於日本京都出生。話說喺1962年正於日本大學鶴丘高等學校就讀高中一年級嘅佢，同年加入大映株式會社，亦即係現時角川映畫株式會社嘅前身，成為旗下嘅女優。同年獲得導演三隅研次睇起，參加電影《青葉城之鬼》嘅演出，其後又相繼喺《座頭市兇狀旅》、《舞妓與刺客》、《大魔神》、《眠狂四郎勝負》等電影飾演楚楚可憐嘅美少女。憑住佢出眾外形同優秀嘅演技，成為喺60年代風靡一時嘅純情教主。
可能有人會問，點解一位只不過十幾歲嘅少女，會擁有如此出眾嘅演技呢？皆因佢其實嚟自著名嘅演藝家族，父親高田浩吉係位著名演員及歌手、兄長高田夕起同細妹高田瞳亦係出色嘅藝人，喺父親嘅薰陶及磨練下，佢嘅演技又點會差呢？
到咗1968年佢決定離開大映株式會社，轉向舞台劇同電視圈發展，並演出《一之絲》、《女系家族》、《雲霧仁左衞門》等多套膾炙人口嘅作品。不過去到1982年，一直以純情形象示人嘅佢突然嚟個重返銀幕嘅破格演出，就係喺日活株式會社嘅色情電影《輕井沢夫人》中飾演女主角中川佳子，呢個決定喺當時引嚟極大嘅回響。事關喺呢套電影中，佢除咗有裸露鏡頭外，更有大量纏綿戲份，尤其係一場浴室激情戲，不僅演活一位慾望婦人，誘人嘅表情同肢體動作，至今仍令人回味不已，難怪電影推出時，唔少電影雜誌都以「從清純派到破格大變身」、「前所未有大膽演出」等為標題，足見呢件事對大家有幾大嘅衝擊！不過咁仲未完，事關佢其後又推出露點寫真《夢陽炎》，展示佢熟女美體嘅魔力，只可惜呢次以後佢再冇大膽演出，難免令人覺得有啲唔夠喉。
撰文：魂