要數今年最冇愛情運嘅星座，一定非今日要介紹嘅獅子座莫屬。如果未有另一半嘅，今年會繼續冇運行；如果有另一半嘅，小心種種原因而要分手收場，就算結咗婚都危機重重，今年真係唔多掂，巴打們認真要小心呀！
其實2014年獅子座嘅朋友喺愛情運上已經冇運行，到咗2015年好不幸地，繼續要食白果。但由今年開始，會對感情事有少少牽掛，不似舊年咁畀眾多瑣事纏身，連諗都冇時間諗，但天生性格高傲嘅你，就算開始考慮自己嘅愛情運時，都會以王者心態去思慮，只想搵一啲接受到嘅異性，談一場想擁有嘅愛情，就因為十畫都未有一撇，但已經要求咁高，想輕鬆搵到另一半，一個字「難」呀！所以未有伴嘅獅子座朋友，直到今年11月感情方面都不會有多大變化，而最佳出手月份，可選1至3月，同埋6至10月，其餘月份都肯定冇運行！至於已經拍拖嘅朋友咪咁老定，除非想今年內結婚，否則會因感情變淡而出現危機，最有機會出現第三者從中破壞，不可不防！
結咗婚嘅朋友亦都一樣，小心自己或者另一半把持不住，畀第三者乘虛而入，特別係今年如果要出外工作或者進修嘅朋友，如果要去成個月或以上，咁真係要小心，單身嘅最多分手，但已婚嘅隨時有離婚嘅可能，可以唔出埠就真係千萬唔好去。另外隨咗真實情人外，手機上嘅虛擬情人都要小心，由於關係太好，無所不談都會影響彼此之間嘅感情，今年5月、9月、10月都係高危日子，至於剛分手想識番個伴，建議你去啲文化氣息超重嘅地方，例如圖書館、博物館、書店和劇院等，必要時戲院和漫畫屋都算，呢啲地方出現嘅男女大多斯文大方，最適合愛好控制嘅你，而且愛好相同，尋找共同話題都易啲，再退一步，自己辦公室和學校都係理想地方，不妨多多留意一下！
最佳數字：2、4、6
最佳顏色：黃色、咖啡色
最佳寶石：黃水晶
最佳位置：文化熱點
狩獵運：★★★
甜蜜運：★★★★
戰鬥運：★★★★
撰文：小德