今日同大家談談玄學與愛情運嘅關係，想未卜先知，記住留意我哋嘅專欄，而上幾個星期都請嚟師傅講解2015年十二生肖嘅愛情運走勢，仲差雞、狗、豬三個生肖，一於今日講埋佢！
師傅話屬雞嘅朋友，今年命盤內有三粒凶星，注定做乜嘢都冇運行，桃花運亦一樣，舊年冇另一半嘅或啱啱分手，今年都注定得一支公，身邊唔係冇異性出沒，但就係點都唔過電，不妨靠朋友介紹一下，由於彼此三唔識七，反而會有拖拍吓，但咪以為有運行，師傅話都係打定輸數好啲，因為最後都係空手而回，一直要等到下年至會有少少好轉。但如果結咗婚嘅朋友今年有好消息，因為好易有仔生，只要兩公婆落啲力，年尾屋企一定有隻羊仔出現！
囡囡如果屬狗，今年有代表男貴人嘅太陽星出現，所以工作同愛情都會因為呢粒星出現而行正大運，有唔錯嘅發展，特別係未有男朋友嘅囡囡，今年可能會出現如意郎君，但千萬別心急要睇定慢慢嚟食，太猴擒主動怕會把另一半嚇走，所以一切要順其自然。而屬狗嘅巴打就差好多，因為有四粒凶星出現，全部都係破壞人際關係嘅星，如果不善處理，感情運會大打折扣，特別係啱啱拍拖，更要提防小人是非謠言等破壞，否則一定凶多吉少，分手收場！
與屬狗嘅朋友完全相反嘅就係屬豬嘅朋友，因為有太陰星出現，陰陽互補，所以男士比較得力，女士反而冇乜着數，而屬豬嘅巴打今年無論工作和愛情運都會特別強，異性運有時擋都擋唔到，但記住咪得意忘形或者一次過同太多囡囡交往，否則後果嚴重，桃花運變為桃花劫，特別已婚朋友更要小心。至於囡囡方面，由於運程稍差所以別太花勁喺感情上，反而專注學業或者工作，相信會得到唔錯嘅成績，另外多去喜慶嘅地方，話唔定會有目標出現！
異性運：虎、龍、羊
桃花運：狗、牛
和合運：兔、馬、狗
撰文：小德
玄學提供：寶源師傅