如果話有邊個女優可以作為上世紀70至80年代，日活粉紅色電影，亦即係色情時代代表人物嘅話，就一定唔可以唔提片桐夕子。事關佢唔單止有粉紅女王嘅美譽，而作品數量之多喺當時數一數二，更演出過至今仍被奉為經典嘅色情電影作品。
能夠以自己個名成為一個電影系列嘅話，足見呢位女優擁有舉足輕重嘅地位。事實上，呢位喺1952年1月26日於日本東京出生，原名小沼由美子，別名五月由美嘅片桐夕子，身高僅得5呎，卻憑住玲瓏浮凸嘅身材，不僅成為性感嘅代名詞，日活作品數量更係冠絕當時嘅日活女優。當年佢從東京公立高中畢業後，便到銀行做白領麗人，只係當時佢對藝能界有着濃厚興趣，於是喺1970年以見習演員身份加入日活株式會社，及至1971年終於可以參加演出處女色情電影《八月的濕沙》。不過當時嘅佢只不過係陪襯角色，直到同年演出嘅《女高生報告夕子的白胸》至係佢首部擔正嘅作品，佢亦開始以片中女主角片桐夕子為藝名，更宣告「夕子」系列嘅來臨。
所謂夕子系列，即指佢喺其後片中嘅女角，絕大部分都以夕子之名登場，好似有1971年《女高生報告 花開夕子》中嘅成宮夕子、1972年《學生妻 忍泣》中嘅山野夕子、1973年《幼妻的告白 衝擊 震撼》中嘅丸根夕子等等。當然亦有一啲例外卻仍歸入夕子系列中嘅作品，好似1972年《白衣天使的誘惑》嘅前川由理同《（秘）女郎市場》嘅新等，當中尤以呢兩套作品為夕子嘅代表作。前者扮演慾望天使嘅佢，展現出胴體魅力以外，嗰種誘惑男士出色嘅演技，而後者則將誘人演技同精彩床上演出成功融和一起，至今仍被視為日活粉紅電影中嘅經典之作。雖然夕子縱橫日活十幾年，並演出超過40套色情電影，但隨住粉紅年代逝去，佢同其他日活艷星一樣轉演電視劇。
撰文：魂