雖然打保齡球可以打到身水身汗，但話晒呢樣始終係室內運動，都未至於打到要剝衫之餘，仲要剝晒光豬咁激呀？話說位於美國新澤西州楓林鎮（Maplewood）嘅保齡球館Saratoga Lanes，喺2樓球區就舉辦咗裸體保齡球活動，參加者可選擇着內衣、半裸或全裸齊齊打保齡，呢個喺晚上舉辦、歷時3小時嘅活動，共吸引超過30名男女參加，而參加者亦相當細心，個個都準備咗用嚟坐嘅毛巾。不過話時話，點解會有個咁嘅活動呢？原來佢係一個以聖路易斯為基地嘅性開放組織Sex Positive所舉辦嘅活動嚟。據佢哋講，活動嘅目的係為咗可以讓大家從正面、開放同開明嘅態度嚟睇性呢樣嘢，而佢哋仲話遲啲會舉辦其他唔同種類嘅活動，帶出呢種正面嘅訊息。