上世紀70年代由日活株式會社所帶動出嚟，長達約10年嘅粉紅色電影浪潮，不但為日本電影帶嚟極大嘅衝擊，同時更產生唔少經典嘅迷人女優，只係如果講日活前期嘅代表性女優係片桐夕子、田中真理等人嘅話，咁後期嘅代表人物則非東照美莫屬。
作為日活後期嘅代表人物，喺1956年8月12日東京出生，原名山邊素美嘅佢，點樣步上日活女優之路呢？話說當年剛從實踐女子學園高等學校畢業嘅佢，一心諗住向電影圈發展，咁啱佢父親有個朋友識得當時日活當家花旦谷直美嘅經理人，得助介紹成為日活旗下嘅女優，而經過短暫嘅實習期後，喺1974年佢演出處女粉紅電影《生贄夫人》。雖然佢亮麗嘅外形獲得大家唔少嘅注意，但講到代表作則要數喺1976年推出嘅另一套日活作品《禁斷•制服之痛苦》。東照美喺呢套以愉虐為題材嘅電影中，扮演一個被凌辱嘅角色，由於佢演得入型入格嘅關係，故此電影不但引起極大反應，更確立佢愉虐系女優嘅地位，接連演出《生贄之女》、《天使的慾望》、《性處女夏之經驗》等作品。
喺演出日活作品嘅同時，佢亦曾經嘗過做導演及唱歌，而著名嘅作品則要數喺1978年推出嘅3分幾鐘短片《闇夜白獸的感覺》，從編劇、導演、演出到唱作主題曲都由佢一手包辦。不過隨住日活粉紅電影嘅式微，佢同其他日活女優一樣開始轉向電視劇發展，而講到佢著名嘅電視劇作品，則唔可以唔提喺1983年首播嘅《阿信的故事》。喺呢套經典日劇中，佢所飾演嘅成熟版加賀屋千金小姐八代加代，不但戲份夠多更展現出佢精湛嘅演技，一改唔少人以為佢只係賣弄身材嘅形象。除咗演技外，佢對裸露亦有自己嘅睇法，話說當時有人搵佢演出一套有裸露情節嘅原創舞台劇，有人覺得為咗以後容易改拍成電視劇，便打算喺演出前刪去裸露內容，佢認為裸露情節有相當必要，加上如果臨時刪去會對唔住買飛入去睇佢露肉嘅觀眾，最後令舞台劇得以足版演出。
撰文：魂