今時今日喺唔少人心目中，日本AV演員打真軍係好合情合理嘅事，只係大家知唔知道，家陣有咁刺激嘅官能演出，全憑一班AV前人努力所致，而當中更有一位被稱為真軍開拓者或色情女鬥士嘅女優不斷付出，先至產生今日嘅結果，佢就係著名日活女優田中真理。
如果話田中真理係位資歷相當深嘅女優，相信冇邊個反對。事關1951年8月1日喺日本東京出生嘅佢，早喺1967年亦即係佢仍係高中生嘅時候，已經加入日活株式會社以實習生身份工作。及至1969年佢終於有機會登上大銀幕，以藝名田中麻里於情色電影《女番長仁義破壞》中演出，而值得留意嘅係佢當時仍為一名高中生。及至高中畢業後，佢正式以田中真理加入日活株式會社，只係喺1969年至1971年期間佢並冇色情戲份演出，反而活躍於電視劇客串，當中包括著名劇集《青春火花》。到咗1971年，真理終於推出首套情色作品《蜘蛛之湯女》，而憑住佢出眾嘅外形即時吸引大家嘅注意。
其後佢相繼演出多套情色電影，好似喺1971年推出嘅《性．公路濕濕騎士》、1972年推出嘅《戀之獵人》、《夜汽車之女》、《好色家族狐與狸》等多套著名作品，全部都叫好又叫座，更與白川和子及片桐夕子等日活一線女優齊名，當中尤以《戀之獵人》引嚟極大回響，卻同時係真理噩夢嘅開始。因為當時日本社會風氣仍然保守，所以警方以懷疑真理喺演出時打真軍、賣弄色情、喺公眾場所發生性行為等理由對佢進行起訴，從此展開長達6年嘅審訊。當時真理經常被有關方面盤問，對佢造成極大壓力，並因此而離開日活。好彩佢頂得住兼不斷抗辯，終於喺1978年6月23日被判無罪釋放，並將鬥爭經歷輯錄成書。
撰文：魂