日本近年嘅「天然呆」美少女相當受歡迎，而所謂天然呆即係性格有啲傻更更。不過講到元祖純情天然呆系美少女，則唔可以唔提家陣仍然活躍於日本藝能界，當年喺「粉紅色電影」公司日活出道嘅著名艷星美保純。
原名曾根千代美嘅美保純，喺1960年8月4日於日本靜岡縣靜岡市出生。喺靜岡精華學園高等學校（現靜岡大成高等學校）讀書嘅佢中途輟學後，去咗當地嘅一間百貨公司工作。及至1980年時，佢參加咗當地舉辦嘅一個的士高王后選美比賽並獲得冠軍，隨後對藝能界產生興趣，於是辭職到東京一間廣告公司工作，為加入藝能界鋪路。唔到一年嘅時間佢就被星探發掘，並以純情天然呆美少女形象出道。剛出道嘅佢不但接連推出多本半裸火辣寫真集，更獲得當年著名嘅電影公司日活垂青，搵佢做女主角演出處女電影作《制服處女之痛》，而戲中嘅佢以純情女學生造型亮相。清純又帶點傻更更嘅氣質，加上玲瓏浮凸嘅身材，配合反應十足嘅床戰，即刻引嚟大家嘅注意。
受益於《制服處女之痛》嘅成功，美保純跟住喺短短一年內，接連接拍《宇能鴻一郎之濕濡騎乘》、《護士日記下午的野獸》、《伊賀忍法帖》等多達9部電影，只係講到美保純嘅成名作，就要數同年拍攝嘅《Pink No Curtain》。片中嘅佢飾演一位外表純情，內裏卻係慾火狂燃嘅美少女，面對種種誘惑嘅佢點樣可以令自己嘅肉體得到滿足。憑住呢套電影，佢喺1982年嘅藍絲帶電影頒獎禮中，榮獲最佳電影新人大獎。憑住情色電影成名嘅佢，之後經常喺主流電影中亮相，而講到至為有名嘅作品，便要數從1984年開始喺著名日本電影《男人之苦》中飾演男主角鄰居桂明美一角。以呢套創下健力士世界紀錄最長系列嘅電影，令佢嘅演藝生涯升到高峰。有別於其他女星，今時今日仍活躍於電視同電影圈，有人氣兼已經「從良」多年嘅佢，一啲都唔介意人哋提起佢以往露點嘅演出，事關佢認為呢段日子係佢演藝生涯嘅見證。
撰文：魂