我成日都同啲後生仔講，千祈唔好好高騖遠，要成功一定要打好根基，由低做起，不知幾多富豪名人都係基層出身，然後逐步往上發展。好似鈴木愛理咁，歌藝了得又索到爆燈，佢曾經只係伴舞女郎，而家陣已成為人氣歌手。
滑滑嘟嘟似豬膏咁滑，牛油蛋撻都無咁滑……小弟唔係食咗草龍，亦唔係中咗六合彩，不過點解會咁好唱口？咪就係見到靚女，仲要係一位又白又滑嘅美人兒囉！邊個呀？佢咪係鈴木愛理囉。今年20歲嘅鈴木愛理嫩口又省鏡，面上帶青春氣息同一分天真稚氣之餘，唔會好似十零歲妹妹仔咁喪賣萌味，而多咗一分柔弱、一分溫柔，兼且再加多一分病態美，睇嚟阿妹同當年剛剛出道嘅王祖賢有幾分相似。身材方面，愛理同小倩亦差不多，大家都係屬於纖巧型，愛理嘅肌膚仲相當白滑幼嫩，質素比好多美白產品代言人更勝一籌。阿妹胴體雪白之餘，上圍尚算有肉，且腰幼腿長，評判團一致裁定愛理吸引力指數至少超過90分！唔記得話畀大家知，評判團只得小弟一個人組成。
鈴木愛理嘅父親係知名職業高球選手鈴木亨，阿媽鈴木京子亦一樣係高球好手，不過阿妹佢就冇跟隨父母嘅腳步向高球發展，而係從事演藝事業。佢喺小學二年級嘅時候，參加「Hello! Project Kids」選拔成功入圍，後來仲同田中麗奈以及夏燒雅參與組合「aa!」，成員平均只得11歲。再過兩年，愛理成為女子組合「℃-ute」成員並發展至今，喺上年仲帶領組合去到巴黎開演唱會。由於阿妹曾經讀過歌唱學校，歌藝了得再加上美貌吸引，家陣喺組合當中嘅主唱位置相當穩固。至於個人發展，阿妹一樣成績優良，除咗經常參與電影演出，推出嘅個人寫真集迄今已有11本之多，認真厲害。然而，阿妹有今時今日嘅成績，所行嘅路並唔係完全平坦，因為剛剛出道嘅時候冇乜人識，一度只係做陪襯品，喺第54屆紅白歌唱大賽中，阿妹就做過松浦亞彌背後嘅伴舞女郎喇。
鈴木愛理現時主要以組合「℃-ute」成員身份發展，所以想發布消息都會透過組合嘅博客，想知道阿妹同其他成員近日有乜搞，可以Click上去睇。
網址：http://gree.jp/c_ute
年齡：20歲
身高：5呎5吋
三圍：31-23-32
撰文：賢