正所謂好佬怕爛佬，爛佬怕潑婦，遇到又惡又大聲嘅母老虎其實乜佬都會怕。虎南有香就係名副其實嘅母老虎，不過大家唔使驚，因為佢生得好靚女，而且平時仲斯文有禮，只係間唔中至會變身，反串飾演男子漢赤園虎次郎啫！
日本有好多女歌手都歌藝與美貌兼備，佢哋嘅身材仲火辣誘人，所以活躍樂壇之餘，更不時會推出水着寫真集，好似最近推出新寫真集嘅谷村奈南就係其中一位。除此，仲有一個樂壇寫真界雙線發展，就係虎南有香喇！25歲嘅有香青春嬌俏，面上嘅稚氣仲好似一個十幾歲，仲讀緊書嘅女仔一樣咁濃郁，認真難得。有香面孔標致，親切得嚟又嘴角含春，一雙亮麗明眸亦同時流露笑意，實在甜到入心，令人鬱結全消。有香個樣好似未長大，但係身材就剛好相反。身高5呎5吋，比起好多同類型嘅水着妹嚟得高挑，腰圍纖幼，胸部則大小適中、略有睇頭嘅C-Cup，勻稱得嚟具曲線美，加埋一身鮮嫩白滑嘅極品美肌，真係惹人遐想。
有香好細個就入讀演員學校，讀完後就離鄉別井，去到大阪發展演藝事業。有香星運唔錯，到大阪後就被事務所挑選成為樂壇組合SOUL TIGER嘅成員，阿妹仲推出過單曲《So Happy Days》添。加入組合之後就曾經鬧一件趣事，某次有香隨組合出席綜藝節目，主持人介紹有香嘅時候，就話佢係組合另一位成員虎南有美嘅妹妹，二人大感驚訝，之後相視而笑，仲話今日先知原來自己有個姊妹。其實，二人只係剛巧個名差不多而已，並無血緣關係，後來虎南有美為免再有誤會，就自動改咗「KONAN」做藝名。有香外表斯文親切，曾獲邀做天氣女主播，亦為教育節目《高中講座•家庭綜合》擔任主持。有香仲有另一個身份，就係赤園虎次郎喇！個名咁男性化嘅？冇錯！有香係舞台團體「風男塾」嘅成員，成員全數都係由女仔反串扮男仔，而變身為虎次郎之後，有香喺舞台演出亦由斯文變成老虎咁威猛，可謂判若兩人，演技高超！
年齡：25歲
身高：5呎5吋
三圍：32C-23-34
虎南有香係舞台演員以及歌手，為吸收其他人嘅演出經驗，不時會睇舞台劇同演唱會，想知道有香最近睇過邊一個精彩演出，可留意其博客。
網址：http://ameblo.jp/yuka-de/
撰文：賢