如果嚟到位於三藩市西北面，鄰近金門大橋南端一個叫做Baker Beach嘅海灘時，見到海灘上有人剝晒光豬打排球嘅話，千祈唔好覺得驚訝，事關你已經嚟到全球最著名嘅裸體海灘！事實上，呢個海灘並非全部地方都可以剝光豬，想享受天體樂趣嘅話，只限於海灘北面部分，否則畀管理員喺南面見到你剝光豬嘅話就會馬上被趕走。
作為合法嘅天體勝地，呢度最出名嘅竟然唔係曬太陽而係打排球。原來自從有人喺度架起排球網後，竟然吸引唔少天體愛好者特登嚟到呢度玩，當然，唔鍾意打排球同曬太陽嘅話，呢度亦係個裸釣勝地，據稱呢度嘅魚獲都唔錯添！順帶一提，上世紀呢度曾經係個軍事要塞一部分，家陣仲保留咗當年嘅炮樓，係個具有歷史價值嘅地方。
撰文：魂