有人話男人可以將性同愛完全分開，為咗解決性慾根本就唔使理會床伴到底認識定唔認識，彼此之間到底有冇愛意存在。相反地，好多女仔都要有愛才有性，同男仔拍拖一段日子，互相了解之後，先會考慮同對方發生關係。男士們就唔好話女人咁做係吊高嚟賣，因為有愛才有性，至可以令女人嘅性生活更滿足。美國賓夕凡尼亞州州立大學嘅社會學家Dr. Beth Montemurro早前進行一項研究，邀請到95名年齡介乎20至68歲嘅女士協助，發現有78%嘅女士認同愛情可以令性生活更加滿足，只有18%認為有性唔一定需要有愛。Dr. Beth Montemurro解釋話，女性愛上對方之後，對性慾嘅抑制會降低，更願意就性行為進行探索。另一方面，愛意增加亦令女性更信任對方，令佢哋喺做愛嘅時候更安心更放鬆，滿足度自然大大增加。各位男士以後記住喇，考慮到女方嘅滿足感，咪一識到女仔就諗住帶佢上床喇！