唔少日本AV女優都希望能從AV界踩入藝能界，只係成功者屈指可數，最多只能喺日本深宵電視劇或成人頻道亮相，而日活時期著名艷星岡本麗卻正可做到呢點。佢不但能從色情銀幕轉戰至電視螢幕，更成功洗底成為人氣同演技兼具嘅演員。
1951年12月19日長崎縣佐世保市出生，原名戶塚明美嘅岡本麗，喺上世紀70年代中為咗追尋演藝夢，隻身遠赴東京加入日活公司所屬嘅劇團藝人訓練班學習演技。須知道日活唔單止有拍電影，仲有製作所謂「粉紅色電影」嘅三級片，而當時有感主流電影市道疲弱，因此岡本麗一開始就被公司指派演出粉紅色電影。雖然同佢嘅演藝夢有差距，但由於當年搵食艱難，佢惟有繼續做落去。
及至1975年，岡本麗終於喺《女高生100人（秘）汽車旅館白皮書》中擔正，並喺1976年先後接拍兩套粉紅色電影《團地妻（秘）出張賣春》同《團地妻 肉體金融》，憑住風情萬種嘅人妻魅力成功打響名堂，而喺1980年時演出著名情色電影《團鬼六 白衣繩地獄》，更將佢喺情色電影界嘅人氣推至頂峰。
喺情色電影界取得成功嘅同時，岡本麗開始染指電視圈，經常喺電視劇中亮相。就同其他藝人一樣，開始時佢只係飾演一啲路人甲嘅角色，據岡本麗表示呢個時期佢曾經感到迷失，只係從未試過放棄，而喺呢個時期佢下咗個重要嘅決定，就係慢慢減少演出情色電影，着力喺電視劇方面發展。呢個決定對岡本麗嘅演藝路有着重要嘅影響，事關佢不但喺情色電影有着重要嘅地位，而火辣又誘人嘅床上演出更係深入民心，一時間又點可能成功轉型呢？佢一直默默耕耘，直到1988年演出人氣電視劇《流浪刑事純情派》終於畀佢得償所願！呢套一直播放到2009年12月至完結嘅長壽電視劇，令佢成功入屋之餘，更帶嚟拍攝廣告嘅機會，及至今日佢仍然活躍於電視圈。雖然岡本麗今日已係半老徐娘，但佢當年慾望人妻嘅放浪演出，依然令唔少男士回味不已。
撰文：魂