渡海濠情：去摩納哥 結識富豪
據英國一份財經雜誌調查所得，全球最多百萬富翁地方就係摩納哥，平均每三個人就有一個，緊隨其後嘅係瑞士蘇黎世同埋日內瓦，所以想嫁個有錢人，不妨飛去當地碰吓運氣，嚟自富城會嘅蘇蘇就話：「要儲定錢買機票至得！」
夜蒲擇偶
蘇蘇話：「小時候有個睇相佬同我算命，話我可以嫁個有錢人，所以咁多年嚟我揀親男朋友嘅首要條件，就係要有錢，但可惜有錢嘅男人唔係老人家就係結咗婚，我又唔想搞段忘年戀，更加唔想做人小三，所以一個一個咁拒絕，後嚟有姊妹教我，想搵啲有錢又年輕嘅靚仔交往，惟有向啲富二代埋手，所以你要嫁個有錢人，就要去啲富二代經常出沒嘅地方，於是我學人夜蒲，去啲富家公子常去嘅夜店玩，可惜識親嘅都係啲已婚富豪，唔通只畀我做小三？」
機會大增
咁你有冇認命呀？蘇蘇話：「我梗係唔認命啦！於是再請教啲高人，高人話喺自己出生地方好難會有好姻緣，要我多啲出國走吓，所以我一直都有儲錢，希望出國碰碰運氣，但去邊個國家？就令我傷透腦筋啦！家陣睇到呢個調查報告，咁我知道要去邊度啦！一於去摩納哥，因為每三個人就有一個係百萬富豪，咁我實有機會碰到啦！如果撞唔到，就去埋日內瓦同埋蘇黎世，總之嫁唔到有錢人，就一於唔返嚟！」
蘇蘇Profile
年齡：21歲
三圍：34-24-34
撰文：小德
攝影：阿程