一啲女仔日以繼夜，夜以繼日咁扮靚靚，無非都係想吸引心儀嘅異性注意，最後釣到金龜上岸唔使做。當佢哋達到目的之後，美艷嘅面孔好快就會變得難與昔日相比。冇計啦！搵到長期飯票仲使乜扮到咁靚喎！不過，例外嘅例子有好多，好似二宮步美咁，就算結咗婚依然繼續行性感，多咗一抹人妻味嘅佢仲更加吸引添。
在學時期，好多學生都會與志同道合嘅同學仔組成小組一齊玩一齊溫習，喺日本水着界亦有唔少類似嘅非官方組織，好似GJK就係其中一個例子，而GJK嘅意思即係G-Cup上圍嘅女子同好會，成員包括矢吹春奈、小林惠美、森下悠里、瀨戶早妃，今日為大家介紹嘅二宮步美都係其中成員，亦係暫時最成功嘅一員，成功唔係在於事業，而係步美喺G奶姊妹當中最早出嫁。今年29歲嘅二宮步美出道以來，以整潔形象以及標致五官，再加上秀麗氣質而吸引萬千水着迷注意。其實，除咗面孔之外，步美一副無敵靚偈當然亦係一大賣點啦。雖然步美身材唔高，只得5呎1吋，但係上圍嘅堅挺G奶夠晒睇頭，而且身上嘅肉地結實有彈性，所以水着界人士就評論阿妹呢副偈係戰鬥型身材。
二宮步美擁有呢副如此火辣嘅胴體，憑此大賣性感，拍寫真或者寫真DVD都毫不吝惜身材，經常大玩搓胸、夾胸、壓胸，所以出道以來一直爭取到唔少人支持。而步美除咗喺水着界發展良好，仲曾經係日本知名電視真人騷《稻川淳二 恐怖の現場》嘅常客，不時被邀請深夜去到荒山野嶺或鬼屋探險，最後被攝影隊拍低佢被嚇到花容失色嘅面孔。另一方面，步美除咗身材同樣貌吸引，佢仲口才了得，近幾年更加專注於擔任單車比賽直播嘅主持人，為賽事作專業旁述。今年6月，步美嘅身份就有所改變，唔係話佢轉行，而係已經做咗人妻，因為佢同拍拖八年嘅圈外男友決定拉埋天窗。不過大家唔使驚，因為步美表明結婚絕對唔會影響其事業，一樣會繼續賣弄性感胴體喎。
二宮步美近期忙於為單車比賽擔任主持人，而佢成日都忙裏偷閒，喺直播室同班同事搞搞震，大家不妨上佢個博客睇吓一啲趣怪花絮。
網址：http://ameblo.jp/ninoreport/
年齡：29歲
身高：5呎1吋
三圍：34G-23-33
撰文：賢