好耐之前，曾經睇過一部電影講述一個猥褻阿叔為咗偷睇女仔裙底，喺鞋面裝咗塊鏡嚟（目及）裙底春光。家陣科技日新月異，喺鞋尖上都可以裝上攝錄鏡頭，不過咁做無論去到邊都係不道德以及不合法，最近喺日本就有專門銷售呢種鞋嘅公司負責人畀人逮捕嘞！早前，日本京都警察生活安全對策課就拉咗一位喺網上售賣偷拍專用鞋嘅公司老闆以及一名女職員，喺行動之前嘅幾個月，當地警方已經捉到幾個利用呢種鞋去偷拍嘅男人。據知偷拍專用鞋尖部分裝有鏡頭，用家仲可以用遙控器操控拍攝，偷拍起嚟真係神不知鬼不覺，售價由20,000至30,000日圓不等，即係千幾至二千幾港元，由於售價相宜，所以呢間公司已經賣出超過2,500對鞋，幸好警方成功逮捕咗呢間公司負責人，如果唔係唔知會有幾多女仔受害喇！