講到花粉夫人被請嚟澳門落戶之後，囡囡們都唔理佢係咪保佑佢哋，一於將錯就錯，總之能庇佑容貌出眾，身材堅挺，佢哋都一於照拜。目前澳門有兩間廟都供奉咗花粉夫人，一間係醫靈廟，一間係康公廟，兩間廟究竟邊間最先供奉呢？連啲老街坊都話唔知道，若然數囡囡嚟拜得最多嘅，一定係位住於十月初五街嘅康公廟，事關走出大碼路，再入一條街就係福隆新街，附近福隆三街嘅囡囡嚟參拜，真係連三輪車都唔使坐，所以囡囡們有事冇事，一得閒就會過嚟拜神，以致沿街吸引唔少登徒浪子站崗，為一睹囡囡們嘅艷色風采。至於花粉夫人嘅寶誕係幾時呢？坊間竟然冇記載，反而金花夫人就係農曆四月十七日，所以有人話花粉夫人都係四月十七日，但就算寶誕當日，善信們都冇話特別慶祝，據坊間傳說，當年澳門有名妓院嘅花魁，都會集中喺大年初一嘅半夜一點鐘，代表妓院嚟拜花粉夫人，上上頭炷香，祈求生意興隆，至於揀大年初一，除咗有去舊迎新嘅意思，原來民間習俗中，初一係「雞」日，唔知係咪咁解，所以囡囡視當日為寶誕呢？