有謂「病從口入，禍從口出」，自小父母都教我哋千祈唔好亂咁講說話，否則分分鐘因言惹禍。早前，日本水着妹小柳步就係冇聽教，唔單只拍寫真夠激，連講說話都過激，搞到一身蟻。
人有相似，物有相同，世界上好多人都可能同自己生得好似餅印一樣，例如台灣名模志玲妹就同AV界嘅波多野結衣非常似樣，日本女藝人前田敦子就同AV界嘅琥珀詩猶如孖生姊妹，至於人氣水着妹原幹惠亦有位師妹同佢相似，特別係笑起上嚟嘅時候，佢就係今日為大家介紹嘅小柳步喇。22歲嘅小柳步青春俏麗，佢炯炯有神嘅雙眼電力十足又有火氣，一睇就知敢玩敢搏兼且活力澎湃。而阿妹個嘴係就係大咗少少，但係雙唇厚度十足，最重要嘅係笑容夠晒燦爛，心情幾鬱悶都好，見到佢都即時精神晒。小柳步嘅身材亦同其形象一樣健康，5呎6吋高嘅佢屬於長身美人，配埋D-Cup上圍以及33吋又大又翹嘅美臀，曲線優美，吸引力非凡。
小柳步喺2009年出道，拍咗寫真兩年都冇乜人識，之不過後來參加Miss Young雜誌嘅選拔活動並取得冠軍，小柳步就漸漸人氣上升喇。可能係藝能界認獎唔認人，獲獎之後嘅小柳步的確今時唔同往日，即刻搵到好多演出機會，包括演出電視劇《大富翁，Poor女人》，到近期就主持旅遊資訊節目《享受7個海！世界先生休養地》。另一方面，見到小柳步身材咁弗，肌膚仲帶點古銅色，相信大家都知道佢熱中運動，所以阿妹亦經常獲日本體育頻道邀請做宣傳大使。雖然阿妹形象健康，但係拍寫真嘅風格就比較大膽，成日都做埋啲意淫動作，例如雪糕抹胸，又或擘到雙腳開一開。然而，阿妹嘅演出風格都唔夠佢講說話咁激。早前，有電視節目討論消費稅增加嘅問題，小柳步就係其中一位嘉賓，當提到加稅係因為政府要為老人家嘅醫療及安老服務負責，佢居然表示唔應該為照顧唔相識嘅老人而交稅。此言一出，即刻畀網民瘋狂指罵佢完全冇敬老之心及同情心，仲話佢完全忽視上一輩對社會嘅貢獻，搞到阿妹要面懵懵咁為不當言論道歉。
為自己不敬言論道歉之後，小柳步終於重新投入工作，大家可以從佢嘅博客上見到小柳步工作時拍低嘅幕後花絮。
網址：http://ameblo.jp/koyanagi-ayumi/entry-11876655539.html
年齡：22歲
身高：5呎6吋
三圍：32D-24-33
撰文：賢