英國有個23歲嘅靚女漢娜，人人都話佢正斗，絕對有做模特兒嘅條件。之但係，漢娜原來患有陌生人恐懼症，每當佢見到陌生人時都會感到唔舒服，甚至會出現頭暈眼花，所以佢一直都好少同陌生人接觸，唔知仲以為佢患上自閉症添！就係因為呢種怪病，嚴重影響到漢娜嘅生活，搵唔到工作，亦識唔到男朋友，可謂冇錢又冇仔，真係陰功豬！於是漢娜就想辦法，希望可以克服到呢個恐懼症，佢試過強迫自己出街同陌生人接觸，但都係唔得，仲搞到差啲暈低添！及後，漢娜決定接受催眠治療，結果相當成功，阿妹不但唔再怕陌生人，個人仲充滿自信心，最後佢做咗模特兒，拍攝內衣寫真添！有網友十分感激呢個催眠師，話如果唔係有佢幫手，Model界就少咗個養眼又好身材嘅漢娜！