奧地利有個女子為咗擁有健康膚色，但又懶出街曬太陽，於是喺家中進行日光浴，不過佢屋企冇露台，於是佢就諗到一個別樹一幟嘅方法，就係拉開個窗，將自己嘅下半身伸出窗外曬太陽，仲用個大咕o臣嚟墊住雙腳。本來咁做已經夠騎呢，佢更剝光豬趴喺度打出個八月十五，如此養眼美景，立即吸引樓下途人嘅目光，個個企定定拎部手機出嚟猛影，就連揸緊車嘅司機都停低欣賞「月光」，結果造成交通擠塞，最後要警察嚟到疏導交通。呢個時候，「月光」已經消失，可能個女子發現自己闖咗禍，於是走返入屋。之後人群散去，交通亦回復暢順，但呢張「烈日下的月光」照片就喺網上瘋傳。