身邊有唔少巴打都鍾意掟鏢，但一般嘅飛鏢酒吧唔係黑沉沉，就係嫌佢哋嘅空氣有啲渾濁，如果大家都有同感，咁呢間位於澳門司打口嘅飛鏢主題酒吧赤Aka Cafe一定可以滿足到大家。呢間喺去年年底先至開業嘅酒吧，內設三部風靡全球嘅Dartslive 2電子飛鏢機，不但可供鏢迷同場較量，更定時舉辦軟式飛鏢賽等大家一展鏢技。唔識掟鏢亦唔緊要，皆因現場有教練教導新手飛鏢機嘅操作同遊戲規則，同場仲設有精緻閣樓，既可俯瞰全場環境，又可同三五知己邊玩骰盅邊傾偈。至於酒類方面嘅選擇亦相當豐富，尤其係佢哋引進咗一種葡國釀製冇酒精啤酒，麥味夠濃又唔驚酒精超標。