講到澳門嘅白馬行醫院，當年最被華人認同，就係佢哋專醫性病，白濁、椰菜花等，可以話一針見效，花柳當然棘手啲，但有錢兼有時間接受治療都唔難醫好。而當時除咗老闆商賈、有錢公子要嚟幫襯之外，唔少青樓女子都會慕名嚟求醫，但囡囡日光日白走嚟睇病，畀人認出，仲使喺澳門街搵食嘅，所以囡囡們嚟睇病，一定要鬼鬼祟祟，首先唔可以日間嚟，只能入夜後至嚟求醫，而為咗照顧呢啲青樓女子，醫院都會特別設咗某日夜晚開夜班。此外，囡囡會由福隆新街坐三輪車，坐去人流最旺嘅南灣，然後再由南灣轉坐另一架三輪車去醫院，因為福隆新街嘅三輪車伕，大多集中同一批人，直接坐去醫院怕佢哋爆出去，話有囡囡去醫院睇病，咁真係邊度都唔使去，而囡囡離開時亦會戴上圍巾，搞到神神秘秘咁樣！去到醫院，因為醫生都係洋人，所以一定要有翻譯，故睇病前要先預備好翻譯，一般都係醫院嘅華人員工或者教友，睇完病又要故技重施，坐回南灣至坐車返去福隆新街，所以想當年睇個病，都唔係咁易！