好多電影系列嘅第一集都被世人奉為經典，好似《教父》、《獨行俠》以及《星球大戰》等，而《鐵金剛》當然亦唔例外，當中經典嘅除咗有風流倜儻嘅辛康納利之外，仲有第一任邦女郎，美艷動人又惹火嘅烏蘇拉安德絲（Ursula Andress）！
中外電影當中，有唔少段落都有出水芙蓉鏡頭，通常都會影住身穿性感泳裝嘅美女，慢慢從海邊行上沙灘，然後仲有一個指定動作，就係雙手輕按頭部兩側，再慢動作咁左右左右咁擰，搞到水花四濺。呢類鏡頭大家係咪睇過不下百次？係咪覺得每個都好似倒模一樣呢？其實此情此景源於一部經典之作，亦可以話係由烏蘇拉安德絲呢位絕色美人打造。
烏蘇拉於1936年3月19日出生，出生地就係地靈人傑嘅瑞士。佢小時候本來都幾幸福，之不過二次大戰期間，父親失咗蹤，之後就由母親獨力撐起成頭家。烏蘇拉初中畢業後，就去巴黎學習舞蹈、繪畫、雕刻。長大後，由於生得高大兼身材健美，對比起當時偏向柔弱嘅好多模特兒同女星都別具風韻，所以就被意大利名導費里尼睇中，搵佢擔任電影《Le Avventure di Giacomo Casanova》配角。
1955年烏蘇拉憑呢部戲初登大銀幕，同年更與電影公司簽約，繼而進軍荷里活，仲拍下一部經典特務片，就係邦片開山之作《鐵金剛勇破神秘島（Dr. No）》喇！喺戲中，烏蘇拉飾演女主角Honey Ryder，出場嘅時候身穿白色火辣泳裝，腰間插咗一把潛水刀，上水嘅時候姿勢迷人，加上佢又靚又好身材，畫面令人印象深刻，而烏蘇拉亦成為歷代鐵金剛系列中評價最高嘅邦女郎，同時影響日後邦片必定會有美艷嘅邦女郎伴隨特務007。烏蘇拉於戲中同占士邦出生入死，其演技獲得好評，並為佢贏得金球獎年度新人獎，而1995年更被英國《帝國雜誌》選為電影史上百大性感女星之一。
成名之後嘅烏蘇拉工作激增，而眾多電影當中，有好多都係裸露作品，包括《藍徽特攻隊》、《Prefect Friday》等，當中最正最誘惑嘅都應該係1975年嘅《誘人女護士》喇，因為戲中烏蘇拉扮演火辣女護士成日都不經意咁露點誘惑他人，有一幕佢更加走入一名少男房中，然後慢慢除衫，過程好似跳艷舞一樣，最後佢赤裸裸咁擒上少男張床，搞到少男忍唔住同佢打得火熱，場面實在誘人至極！
撰文：賢