所謂虎父無犬子，名將之後多少都可以遺傳到優良天賦，再加上父輩幫一把，成功嘅機會自然高好多。有尖叫女王之稱嘅經典火辣女星珍美李寇蒂絲，其父母雖然都係赫赫有名，但佢嘅成功則係靠自己一雙手創造而來。
珍美李寇蒂絲（Jamie Lee Curtis）1958年於美國洛杉磯出生，其父親正係二十世紀五十年代紅極一時，以一頭黑髮以及電眼被封為性感男神嘅東尼寇蒂斯（Tony Curtis），而媽媽就係知名女星珍妮利（Janet Leigh），一個係型男，一個係索女，兩者結合而誕生嘅愛情結晶品當然有質素保證啦。珍美李雙眼同父親一樣深情又有電力，而面孔就同阿媽一樣標致迷人，散發出動人神韻，即使佢以短髮示人，亦一樣咁有女人味。此外，珍美李身材高挑，前凸後趷，胸前嘅天然美巨乳更係堅挺豐滿。不過，珍美李嘅成名唔係賣身材，而係靠嚇！1976年開始，佢客串演出電視劇。到1978年就一炮而紅，只因珍美李演出經典恐怖片《月光光心慌慌》時嘅逼真驚慌表情，以及歇斯底里嘅驚呼尖叫，深深咁令觀眾們感到驚嚇。
珍美李除咗憑住《月》片打響名堂，仲榮獲巴黎科幻影展最佳女主角獎添。之後，陸續拍咗唔少恐怖片，同樣以逼真驚嚇表現而備受讚揚，故獲封為「尖叫女王」。後來，珍美李唔想被定型，於是接拍喜劇電影《運轉乾坤》，而佢又憑此贏得英國電影學院獎嘅最佳女配角獎。從影以來，珍美李雖然以演技為賣點，但係佢亦不時有性感，甚至裸露演出，當中演得最激嘅就一定係《情書》喇，佢除咗同男主角有多幕床戲，仲有場影裸照嘅戲份。不過，對於小弟嚟講，珍美李最誘人嘅演出相信係《真實謊言》。戲中，打扮到成個大嬸咁款嘅珍美李有段戲被迫跳艷舞，而佢一個變身就變成火辣到震嘅艷舞女郎，着住半罩杯胸圍以及高衩底褲扭身扭勢，真係誘人之極。無獨有偶，珍美李喺《情書》當中又係着住高衩底褲，相信佢自己都覺得咁樣至可以凸顯其臀部之優美。
撰文：賢