早前英國男性雜誌《Nuts》宣布印刷版正式告別讀者，以後想睇，就要上網或用手機睇喇！該雜誌發新聞稿表示，因受制於市場愈趨電子化，令實體雜誌銷量不斷下跌，加上英國女權組織反對男性雜誌刊登過分暴露嘅照片，有辱女性之嫌，同類型雜誌除咗要「入袋」之外，仲要擺放喺唔當眼地方先可以售賣，令生意難以維持，惟有忍痛停產，轉戰網絡發展。對此，女人就開心，但男人則好傷心，事關呢本主打18至30年齡層嘅男性雜誌，讀者們最留意嘅內容必定係「每周一女」，仲有「同Cup囡囡對對碰」，而每逢年尾又搞「100 Sexiest Babes」全球百大寶貝嚟提醒巴打有乜索女，總之成本雜誌都係女女女，逐頁揭嚟睇，真係睇得零舍開心！而據成人新聞網站表示，《Nuts》自2004年1月創刊號推出以來，高峰期每周銷量高達300,000本，無奈上年銷量急劇下跌，有市場調查公司統計已跌至53,000本，網絡版則只得9,000名收費用戶，「止血」可算係最直接有效嘅生存方法。