正所謂莫欺少年窮，只要有志氣，哪怕今日只係一個小小嘅辦公室助理，他朝都可以做總經理，好似日本水着妹齊藤麻里奈咁立志做歌手，雖然家陣只係喺一間咖啡店賣唱，但係憑其出色又落力嘅演出，相信佢一定可以大有作為。
日本好多女仔都希望成為水着寫真偶像，不過通常都唔係佢哋嘅終極目標，因為水着女優只係一塊踏腳石，日後就有機會踏足藝能界，或成為演員、歌手，作兩棲發展。當然，最好就係學井上和香咁嫁個好老公上岸做少奶奶啦。齊藤麻里奈就未諗住咁快嫁人，家陣就一邊做住水着妹，一邊向歌手之路進發。22歲嘅麻里奈青春可愛，眼仔精靈又有神采，雖然棚牙唔係好靚，但係笑起上嚟甜美又親切，仲充滿童真，真係令人覺得甜到入心。而呢位甜心美人兒除咗笑容可親，身材一樣咁高分，因為皮白肉嫩，胴體又有曲線美，胸前嘅D-Cup美乳仲夠晒分量，感覺苗條勻稱又健康天然，順眼兼夾養眼。
2010年，仲讀緊大學嘅齊藤麻里奈參加Miss FLASH 2011選美比賽，憑住充滿陽光氣息嘅特質以及姣好身段而勇奪冠軍，從而成為水着妹，後來阿妹仲被挑選為Miss FLASH雜誌旗下女子組合GGirls嘅成員，同其他水着妹以歌手身份四圍演出，其首本名曲就係《魔法相關Love Me Do》。另一方面，麻里奈亦開始向電視界進發，演出過嘅電視節目包括《全力板》以及《Dokumo Cafe TV》等。雖然曝光率甚高，但佢嘅目標係成為歌手，幸好今年初，曾發掘知名男子組合「GReeeeN」嘅音樂製作人山崎吉史，發覺阿妹嘅歌聲相當有感染力，於是就將佢帶入所屬嘅唱片公司。現時，麻里奈就一邊拍寫真，一邊做歌手，而為咗增加知名度，阿妹就去到涉谷一間叫做factory咖啡店每周演出三日，每次都係自己彈結他獨唱。麻里奈就表示家陣雖然只係喺呢間得30個座位嘅咖啡店表演，但係立志有朝一日可以去到容納上萬觀眾嘅知名表演場地武道館演出，希望阿妹願望成真啦。
簡介：齊藤麻里奈近期除咗在咖啡店獻唱，仲經常為時裝雜誌拍寫真，每次工作完畢都會將拍攝情況於博客發表，想知阿妹又着咗邊套衫影相，大家可以Click上去睇睇。
網址：http://ameblo.jp/saimari-kiyose/
年齡：22歲
身高：5呎3吋
三圍：33D-22-33
撰文：賢