日前講到大馬路嘅域多利戲院，地方小小，但娛樂設施一應俱全，當中有玩有食，仲設有「花舫」嘅玩意，大家知唔知乜嘢係「花舫」呢？以前澳門內港未填海之前，有好多避風塘，當時「花舫」眾多，供客人上舫尋歡玩樂，每一艘花舫上都有舫主駐場，即係一船一女，客人只要花得起錢，佢哋就會陪唱陪飲，之後仲包埋有下文添。後嚟避風塘填海，於是有人將花舫搬入大樓內繼續經營，唔通喺房裏面整隻船喺度？咁又冇咁誇張！只係將房間布局，搞到同花舫差唔多，入內只見清雅大廳，可供舫主與客人把酒談心或者彈曲獻唱，當酒過三巡後，就可以入臥室休息。以前又要船租，又要船伕，玩一次嘅價錢可能貴過陸地嘅妓院，但勝在夠風味，家陣搬咗上樓，風味大減，而成本就平咗好多，而且以前舫主一晚只可以接一名客人，但搬上樓後，舫主有吸引力嘅一晚可以做到幾輪客。由於消費變得相宜，故吸引不少客人捧場。除咗域多利戲院，當時唔少地方都設有呢啲上樓「花舫」玩意。