我個人最喜歡食清湯腩，每次到食肆都忍唔住要叫碗嚟祭吓五臟廟，因為除咗啖啖肉夠飽肚外，食完再將碗牛肉濃湯飲光，即時會令你渾身是勁。但由於近年牛肉愈嚟愈貴，部分食肆要將價就貨，加上師傅功夫參差，所以食到嘅牛腩都令人失望嘅多。有老友話如果過開澳門，一定要上9號會所試吓佢哋嘅清湯爽腩，咁啱日前上開去，就叫老總整碗嚟試吓。佢哋嘅清湯爽腩用煲仔上，係用崩沙腩炮製，食落好有口感，筋膜位完全咬得到。此外，最欣賞嘅仲係配菜嘅蘿蔔，完全吸收晒牛肉嘅鮮味，加上蘿蔔嘅清香，可以話係完美配搭，足證師傅廚藝了得。此煲清湯爽腩，值得向大家推介。