澳門Style：菠蘿炒雞柳

大家都一定聽過一句歇後語叫「菠蘿雞」，意思就係一味靠黐，形容一些人借機向別人沾點好處。不過講真，食咗咁多年菠蘿雞，啲甜酸汁整得唔好真係幾難頂。前兩日喺大富豪桑拿，見隔籬枱整碟菠蘿雞嚟食，有陣陣清香嘅菠蘿味，令人食指大動，於是即刻整碟嚟試吓。原來大廚採用新鮮菠蘿嚟做，而且買番嚟仲要放幾日，等菠蘿熟透。而另一主角嘅雞，大廚唔用雞件而用雞柳，食落啖啖肉，最重要個汁，係用鮮菠蘿嚟打汁炮製，所以甜酸度啱啱好，加少少四川豆瓣醬，快炒上碟，難怪食落雞柳滑溜，菠蘿清香，芡汁仲果香撲鼻，令人飯癮大起！